Do you know what FEAR stands for? False Evidence Appearing Real - Lou Bloom
（當然有劇透，但我相信影響不大）
唔敢話識啲乜，但作為一個年年拎一萬幾千銀，比錢入場睇戲（而唔係為左同朋友聯誼，或入去攬女）既觀眾，大時大節，如聖誕農曆年之前，就係「最好的時代，最壞的時代」。因乜？因為大時大節多數上爛片，或者叫冇腦大製作合家歡片。你懂的。而好多好戲，都會趕在大時大節前上，好多滄海遺珠可以執，但又因為谷埋一齊上，未必睇得哂。
頭條殺機（Nightcrawle）就係一套備受忽視既好片。
Nightcrawler係蚯蚓，但容許我離題，主角積佳蘭賀Jake Gyllenhaal在片中，實在係似一隻貓頭鷹，又似烏鼠。暗角中， 凌厲而陰森的眼神，吞噬黑夜洛杉磯既一切。Jake的神態令我諗起頹look的尼古拉斯基治（Nicolas Cage），或者係李燦森。當然大家都知Jake減磅廿磅演出，但對當代鬼仔鬼妹演員黎講呢啲真係基本要求。你估香港咁，阿Sa講句「我有比你X架」都咁震憾。仲好似話正場已經冇左呢段（粗口內容，慎入）
Jake其實只係34歲，算係幾好命，或幾不幸，拍斷背山（Brokeback mountain）拍檔都香埋，而廣為人識。但之後的代表作唔多，或者亦可以話佢唔濫拍，最膠亦不過係拍左波斯王子（Prince of Persia: The Sands of Time）。其他例如殺謎藏（Zodiac）， 危機解密（Source Code），警戰實錄(End of Watch)，或者罪迷宮（Prisoners），都算係好戲，但就係爭咁些小，或者未夠獨當一面。
直到呢一套。
「頭條殺機」古仔既大橋，其實普通過普通，劇透都冇乜所謂，你睇簡介甚至懷疑佢點玩得完成套戲。但， Dan Gilroy呢套處子導演作，絕對係水準之上。
首先，選角應記一功。Jake的發揮相當好，睇簡介就知主角Lou係爛仔/古惑仔轉左做「特約記者」一腳踼。但戲入面果位絕對係智慧型罪犯，呀，記者。留意Lou開頭雖則係賊仔，但講野溫文有禮，求職都十分謙遜，講野甚至好old school。 真的，Lou絕對係天生我才，往後大家睇到佢學野有幾快，又有幾醒目。而且絕非爛鬼書生不擅交際，佢將佢既知識應甪自如。但社會最初冇比機會佢。搵唔到工，甚至唔收錢做intern都冇人理，唯有迫上梁山，埋沒良心，去……做記者!真係夠哂諷刺。
與其話Lou係爛仔，不如話係宅男，留意佢基本上係冇朋友冇家人的。佢一開口講野，就係一個「專家」。同你堆由核電廠到伊波拉到希臘政局都好似無所不知的網友一樣，佢識既野，全部都係網上睇番黎。有互聯網，邊個仲需要傳統教育?亦同時間，人人可以做記者。Lou開口埋口，十分「MBA」，講做生意講管理，多過打打殺殺或對社會有乜不滿。我數住，成套戲，佢居然去到差不多45分鐘先講第一句粗口（正如我篇文寫到呢度都未有粗口，破哂記錄）
其實呢套戲絕對係靠Jake獨力孭飛，剩番既就係靠execution（譯「執行力」怪怪的）。套戲個plot望落冇乜新意，好多情節你一定估到。甚至我一路睇其實一路都幾擔心，但每次擔心果時，最後又證明我係多餘。好多時拍戲，個plot大家差不多，好片爛片（或有冇誠意）既分別，就係細節，手法，execution。
我有擔心套戲開頭太急，其實佢冇點交代Jake的背景，亦都冇點樣好掙扎，三扒兩撥就由爛仔小偷變左「記者」。但呢種擔心係多餘既。我又擔心中間講佢「上位」的過程太悶，最後導演又係輕輕帶過，冇淪為遊花園嘥時間。
最精彩既，就係中間的「愛情線」。我正呵欠，心諗，頂，「一號皇庭」咩，正以為又係荷李活包裝的TVB劇。丫，又係我捉錯用神。導演處理呢條「愛情線」真係正爆。甚至係例牌地，呢啲戲埋尾最後梗要整單大案，一樣係好。成套戲總結，就係好老套的一句：情理之中，但又有意料之外。
套戲並冇咩刻意要「傳達」乜訊息，批判乜乜。冇乜說教。好大程度上佢都係講一個人既古仔。但你以為搵戲黎做？錯啦，幾時都話，現實比創作更荒謬。唔信?睇下呢單舊聞， 巴西犯罪節目主持人次次都可以極速去到現場。 原因？ 你懂的。
當然，佢想講既東西，大家都聽唔少。香港地，而家當然新聞自由先係重點，記者係聖人。但傳媒惡習不分國界。突發港聞財經記者全部齊齊夾古仔，天下文章一大炒，小題大做，觀點當事實咁寫，就是常識。還有高層最鍾意的「讀者為先」。觀眾鍾意血腥垃圾，我地就比佢。有幾多個好似謝安琪咁，會問「個B鍾意食屎你係咪比屎佢食？」（又，如果係張繼聰鍾意呢？）
稍為有新意既，當然係套戲講到互聯網，社交網絡，新媒體。人人都係記者。Fuck that 專業訓練啦。人地呀Lou上網學野叻過幾多大學生。讀Journalism？不如買部靚啲既機，開架勁啲既車。新聞操守？你覺得戲入面「正統」新聞工作者好有操守？總之，有錢人住的和平社區忽然間有血案，就係好古仔。最好係少數族裔犯案。 至於黑人墨西哥人亞洲人，貧民區唐人街，死幾多都冇人關心，唔係新聞，報黎都嘥時間，分分鐘累你比人炒魷。正所謂“The perfect story is a screaming woman with her throat cut, running down a street in a good neighbourhood”
明顯地，大多數人，並冇因為科技更先進，資訊更流通，而眼界大開。相反，我地更加傾向圍圈打飛機，單打不如互吹，我like我我share你。呢個現象無數多文章分析過，不再講。
更好玩既係，你以為傳媒「唯利是圖」造就劣質新聞？結果「新聞」門檻低左，「新聞」就更加低質。原因？唯利是圖的劣質傳媒都仲要「迎合市場」口味。家陣我都冇牟利，我都冇收你錢，我仲使Q理你感受？
就好似我呢篇文咁。