嗰日同一班好姊妹吹水，個個都算高薪厚職。不過大家一講到喺香港打工，個個都話辛苦。其中一個仲好感嘆咁講：「個個都叫我做中女。不過喺香港打工，適婚年齡正值上位期，就算搵到如意郎君，結婚後轉工都唔易。譬如我公司，不明文規定係盡量唔請結咗婚幾年嘅女性。因為怕佢要生仔、放產假，返嚟開工後會冇咁落力，只係顧住屋企。 」
當大家喺度慨嘆香港做打工仔，尤其係適婚年齡嘅女士，係幾咁困難嘅時候，我不禁沉思： 咁嘅工作環境，對整個社會係咪好呢？
近年我公司嘅同事非常好生養，一個接一個大肚。作為我呢啲小企業，有同事要放產假，都幾頭痕。不過開得公司請得人，就預咗。仲記得當年其中一位同事，加入公司兩個月後，好唔好意思咁同我講話佢有咗。其實按香港法例，雇員要工作滿40週以上，先可以放有薪產假。但經過一番內心掙扎後，我都決定全數支付佢產假期間嘅人工。原因好簡單：我相信身教。當我希望企業對社會盡責任時，自己就應該做個負責任嘅企業。如果一位有能力嘅同事，因為要盡生兒育女嘅天職而被懲罰收唔足人工，咁我即係間接話：「我唔歡迎打工仔生仔」。香港要進步，就應該鼓勵高學歷嘅女士生育。再加上香港生育率偏低，作為我呢類小型企業，可以做嘅，就係盡量令到同事可以返工之餘亦都能夠顧及家庭。
依家啲公司好興講企業社會責任，其實企業社會責任唔單只係安排同事做下義工、減少碳排放又或者幫啲家境唔好嘅人。企業對社會嘅責任，更可考慮埋員工嘅 well-being （福祉)。畢竟人需要糊口, 如果企業可以容讓員工在工作之餘，有多啲空間去選擇自己所喜歡嘅生活，相信香港人都可以無咁燥。blog:www.hkmadamwong.com
