我宜家正式宣佈，今晚六合彩攪珠，係我改變人生嘅重要時刻。
記得N年前，阿嫲成日都會拎住張六合彩飛，好肉緊好專心咁望住電視機對號碼。喺以前，我唔明有咩咁大件事。
但係喺今晚，我終於明。
其實一路以嚟自己最接近六合彩嗰次，就喺阿嫲中過幾千蚊之後請我同表弟去迪士尼玩。到咗大個，聽到今期獎金累積到一億幾，話唔心動就假。
雖然政府廣告都有講：沉迷賭博，等於倒錢落海。但喺六合彩自面世以嚟一直都畀咗無數個希望畀香港人，以小博大，都唔係冇可能，所以大家屢敗屢戰！
直到尋日，一個好即興嘅決定，成就咗人生第一次入馬會、第一次買六合彩同第一次填飛。
皆因一句說話，”I have a dream.”
連馬丁路德金都話我有一個夢，鼓勵咗年青人要上進嘅心。我有時相信自己就係被選中嘅細路，奇蹟隨時降臨，所以買咗飛番去就立即喺神檯上香。
「歷代祖先保佑…如果中咗嘅話，首先我一定會捐部份嘅錢畀慈善機構行善積德；第二，我會喺幾年內一直環遊世界，增值自己，見識下各地嘅風土人情…」
今晚飯後，開住好耐冇睇嘅本港台，仲有十分鐘就到攪珠，我靜靜咁坐喺梳化，好好咁思考我嘅人生。
中咗之後，應該買九龍定港島區嘅樓呢？
陣間打畀女神，佢對我嘅態度應該唔會再咁冷淡。
而星期一就可以訓晏啲…
一切，都將會改變。
呢個時候，一首熟悉嘅音樂令我回歸現實，又見番熟悉嘅太平紳士、熟悉嘅命運之輪，同細個唔同嘅係，換咗個女主持周嘉莉。
講完一大輪，終於開始，唔同顏色嘅號碼一個個咁碌出嚟，碌到最後一個，我再睇多次主持人報數，我簡直不能相信自己嘅眼睛！
呢個moment，我個表情就好似任達華喺「極速傳說」入面尾段嘅演出一樣，好唔甘心咁講：
「點解…點解連兩三個字都中唔到！？」
一切，經已回復正常。
我索性熄咗電視，成隻鬥敗公雞咁去洗個面
下期六合彩會唔會再買，我唔知道，但我會好好收起呢張人生第一張六合彩飛。
星期一，準時番工。
張寒山