岸西
岸西係金牌編劇就好多人知啦，《男人四十》同埋《甜蜜蜜》都係佢既杰作，第一次導演既戲係《親密》，套戲都真係幾高章，票房當然就麻麻，所以呢云都有D擔心佢架！
話時話呢套野都真係有D期待，話晒我都係灣仔住左兼做左野頭頭尾尾成十年咁耐！
不過唔知道點解，係睇套戲之前，一直諗住套戲會「衰收尾」，即係唔慌大團圓結局個隻，不過睇下睇下，睇到「印度阿星」好神化咁蒲左幾次頭，全院都笑騎騎咁，我先冇咁驚，咁虛幻既，心諗呢次掂勒卦！
呢套野一個唔覺意真係隨時悲劇收場，本來呢，套戲名叫《鏡花緣》，大佬，一聽個名都知「舔」硬野啦，導演「岸西」話個故事靈感係黎自一部俄國片《obeomov》，講述帝俄時期一個二世祖，講佢成日懶懶閒咁，但都算有自知之明，勸女朋友唔好跟住佢，套戲都幾慘情架！岸西上次拍《親密》已經扑到直一直，不過佢老闆江志強都算唔話得，岸西話佢從來冇干預佢既創作，今次都剩係話叫佢「拍得商業D啦」，都明既，唔使食咩！岸西話會擺D商業上既包裝同埋元素係裡面，但又唔想咁大路，都希望有D野講，又大家睇完之後，會開開心心，覺得好多野其實都唔係咁悲觀既。我諗，做人都應該係咁既，世界再艱難，都要過架，開心又一世，唔開心，都大半世……。
相睇
故事首先係講電器舖太子爺阿來（張學友）同埋潔具舖既愛蓮（綽號屎坑西施）（湯唯）為左應酬長輩，被迫相睇，女既等梗男朋友，男既就等梗運到，都係冇心個隻，愛蓮出發前仲特登化痕粧「扮醜」，阿來就都係一貫作風唔嗲唔吊唔瞅唔彩咁，結果就梗係冇下文啦，雖然雙方家長都好想搞成單野，但而家你估仲係幾十年前咩，牛唔飲水，都唔使旨意襟得牛頭低。
不過姻緣既野就係咁卦，無心插柳反而成事，佢地初頭雖然貼錯門神，大家又有所屬，但就係因為大家都鍾意睇偵探小說，誤打誤撞，搞下搞下，無形中就有左好感，卒之成左一對「歡喜冤家」。
諗起幾年前，有一次有位小妹妹問我有冇女朋友，我照實講啦，佢就話不如介紹個比我啦，我口花花咁答佢，話如果有佢咁靚，我又唔拘喎，結果佢原來真係有個姨仔，佢仲諗得好周到，話佢係銀行做既，我可以詐家衣去「睇版」先添，睇岩先上都未遲咁話。因為個小妹妹實在好省鏡，搞到我都真係心思思，結果我真係借頭借路咁見左呀「姨仔」，個小妹妹都真係送佛送到西，佢知道我鍾意影相，個期岩岩有花展，於是佢就話約埋我地一齊去花展影相，不過唔知係咪第日我心情唔靚定係點，或者諗起某個人，於是我懶cool咁同佢講：「對唔住喎，我影相唔係為左溝女既！」唉，人地又靚女又咁好舖排，我都咁串，難怪之後折墮左咁多年都冇運行！
阿來
張學友《男人四十》就係岸西編劇既，但係《月滿軒尼詩》裡面都之不過話係四十一歲，歌神即係歌神，八年前四十，八年後四十一，令我諗起「山中方七日，世上已千年」呢句野。阿來份人冇乜本事又懶散，但都算幾忠直幾隨和，講野又幾搞笑，傻得黎算幾可愛，另外仲幾有自知之明添。佢同重逢既舊相好講，話佢之前撇自己係岩既，仲話唔好以為佢成日渾渾噩噩，其實佢自己一直都知道自己唔惦，做人老公同埋老竇都好勉強，連累人就無謂……。
佢好多時都好木獨，但對住D岩傾既人又幾生鬼，有一場戲係講愛蓮既男朋友阿旭係條街到開佢拖，打到佢口腫面腫，係笪地度典下典下咁，但佢都死雞撐飯蓋話，佢識引愛蓮笑，阿旭就唔得。
如果係我，一係就快閃，一係就「立」傢生同佢片過，得鬼閒同佢講耶穌。
唉，唔知呢，香港地就係咁，人人都要smart要上進，如果唔係就係死蠢冇出息，
話時話唔怪得我自己睇呢套戲代入感咁強啦，我人都係唔慌醒個隻，咁多年亦都係渾渾噩噩咁過……。
但人呢，係唔係個個都可以勤奮上進年青有為呢？係咪個個都可以買樓買車或適合娶老婆呢？朝九晚六＋奉旨OT係咪就係我地要過既生活呢？呢D咁後現代既問題，我都真係唔係好識答。
有一場戲講阿來媽媽（鮑起靜）入左醫院，醫生問阿來佢阿媽幾多歲，佢竟然話唔知，仲話佢好後生姐，身體不嬲都唔差，況且佢都未見過佢阿媽既真面目，佢老人家平時化粧化到痕一痕，痕到連佢個死鬼老豆（盧冠廷）都唔知咁話。但個醫生當然冇咁懵炳啦，佢問阿來幾多歲，阿來答四十一，醫生話咪係囉，你都四十一，你阿媽仲唔係老人家咩。
話時話我都唔知我大佬幾多歲，個日狄娜過身，睇新聞佢原來同我大佬同一年生，嘩！我個哎吔大佬都六十有五啦，都係既，我都四張啦，都真係懵下懵下。
愛蓮
愛蓮自細父母就唔係度，細細個就黎左香港投靠舅父，幫手打理潔具舖，或者係因為身世關係，佢性格都幾倔強，平時都唔多鍾意出聲，得閒就睇偵探小說。有一次佢係車到比人非禮，成車得一個人挺身而出英雄救美，結果呢個人後來就做左佢男朋友，呢個男人其實唔適合佢，佢雖然係有正義感，但份人牛精到冇人有，後黎仲出左事坐監，但係愛蓮都好唔話得，係外邊一直等佢，但等到佢出左黎，大家一齊又真係相處唔倒，咁先至肯講拜拜。
全世界既人都會覺得愛蓮好蠢，個男人冇前途唔再講，最慘係根本同佢唔夾，等一個人當然係浪漫既，衰多二錢重既係，係等既過程，係段關係裡面會愈踩愈深，當中可能有內疚，又可能又幻想，總之惡搞。
愛蓮呢種等待係叫「擺明等」，阿來就仲衰，叫「暗楷等」，佢有個青梅竹馬既女朋友敏如（張可頤），人地婚都結左九世啦，佢都唔知等乜春，有場戲個好耐都冇溫佢既敏如打電話比佢，成日訓都黃朝白晏既佢竟然起身飛撲去覆人電話，都真係非常冇出息。等待有時係好浪漫既，但更多既時候係一種病，咁暗病咯喎，通常都大鑊D，不過呢味野，唔係過來人又點會明丫！
電影裡面冇乜交待到愛蓮既心路歷程，不過，我自己就明，因為，我都係咁既人，鍾意胡思亂想，唔理個地球點轉，自己覺得岩就心口有個勇字，一味死衝，直到反車出事，成身傷晒，先肯收皮……。
人生如戲，自從湯唯被大陸無厘頭封殺之後，大家都覺得好可惜，李安於是拜托安樂既老闆江志強幫佢，佢用「優秀人才入境計劃」申請左湯唯黎香港，然後再送佢去倫敦讀戲劇。香港地歷來不嬲都就係「避秦」之地，估唔到回歸之後，都仲係咁！
講開湯唯因為《色戒》比人封殺都真係好冤枉，D記者曾經想同封殺主謀單位「國家廣播電影電視總局」（廣電總局）正式求證究竟發生左乜野事，廣電總局又話唔接受採訪，但又話：「沒聽說這個規定，不願回應」，直到有台灣記者趁住開政協會議問廣電總局副局長，個副局長居然話：「這個政策是對事不對人的」，但就唔肯再解釋湯唯點解會比當局封殺，查實當初《色戒》又係你班契弟審批既，雖然係「剪接版」，但都叫做全國公開上映呀，當其時李安仲同埋王力宏湯唯一齊去上海參加首映禮添，之後先至話要封殺湯唯，但又鵪鶉唔敢講乜野原因，套戲入面做「漢奸」既梁朝偉冇事，導演李安仲做埋乜鬼奧運藝術顧問，共產黨剩係敢向個新人落毒手，咁冇guts，有膽做冇膽認，正一係契弟中既契弟！
不過呢，或者真係「國情」唔同卦，你睇下毒奶粉或者四川地震D受害人，仲要比人拉去坐監添，相比之下，湯唯都算執返生彩，亦都真係幾「對事不對人」，又兼幾「和諧」架勒！
又或者，真係好人冇好報，內地戲劇制作人袁鴻講過，之前《色戒》上映，湯唯攞左好多獎，但獎金其實都比晒劇團，仲成立左一個基金，用來扶持左好多優秀既戲，例如日本話劇《玩偶之家》、杜雷既《十個人的夜晚》，仲有上海既《洋麻將》。
不過我諗人呢，受多D磨練都係好事黎既，希望復出既湯唯可以更上一層樓啦！
灣仔本土／港產（愛情）片
《月滿軒尼詩》其中一張電影既海報上面，阿來同埋愛蓮係檀島茶餐廳撐檯腳，窗外邊係循道衛理教堂，我諗呢，如果果間係舊陣時既教堂就好囉，可惜間紅磚屋係十幾年前已經拆左。
頭先講到阿來比人打個場戲我一眼就認得出係喜帖街一位既巷仔，喜帖街就係利東街，之前有D大學生去反對清拆，結果比D差佬玩，唔比佢地保釋，又剝光豬搜身，諗返香港而家似乎都唔好得過大陸幾多。
仲有一場戲就係阿來臨尾去完阿媽既婚禮之後，飛奔去茶餐廳溫愛蓮個一幕都係係嘉帖街拍既，岸西話係喜帖街就可以睇到香港既滄海桑田，拍戲當時成條街其實已經拆清光，圍晒皮，空「了了」，成個片場咁。
套戲既另一個場景係檀島茶餐廳，呢間餐廳當然唔係好似係海報上既果一頭啦，佢真係響軒尼詩道，近地鐵站個邊，因為日頭要做生意，所以戲幾乎都係夜晚拍既，張學友曾經有一晚要食十個麵包既紀錄，其實都唔算好多啦，湯唯就話佢鍾意食菠籮油喎。海報裡面menu牌寫住「淨飲雙計、齋坐三計、相睇四計……」，都幾抵死。
不過記憶中我住左響度咁耐，都係去過呢間茶餐廳兩次咁大把，仲係因為要帶D外地人先黎咋！當然前幾日睇完套戲，我都有黎多一次，成場都係《月滿軒尼詩》既電影宣傳海報，好可惜見唔倒湯唯，甚至根本冇人會係度睇書，刨馬經就有！
我記得杜琪峰拍既《文雀》都好多街頭風貌，不過個套拍既係中上環，而呢套就係灣仔。唔知點解，我睇完套戲，都真係有D唏噓，滄海桑田，不止話係地方，亦都可以係講香港愛情電影或甚至係香港電影，我地曾經有過《秋天的童話》、《天若有情》、《新不了情》、《金枝玉葉》同埋《甜蜜蜜》呢D咁既經典愛情港片；香港亦都曾經響電影產量排名全世界前三名，而家大江東去，除非你學到吳宇森可以殺入荷里活，又或者學陳可辛北上泊碼頭拍大片，如果唔係，響香港拍下好似《月滿軒尼詩》咁既本土小品，穩打穩紥，認真講下香港既世俗人情，都或者係另一條生存之道！再唔係，落重D本，拍套港版《海角七號》都仲得，鮑參翅肚食得多都會滯啦，反而地道小食款式多多，就地取材，長玩長有。
仲有呀，D內地人睇左套戲，都話寧願睇到廣東話版，話更加原汁原味咁話添，所以我話呢，其實香港人都唔使自大，亦唔使灰心，大茶飯唔易食，但用返多D誠意，整返三兩味撚手小菜，又有幾難呢！
片中阿來響香港公園去完母親既婚禮，就略有所悟咁馬上冒雨飛奔去茶餐廳溫愛蓮，結果愛蓮真係響度睇緊偵探小說，係唔係就係暗示，愛情大偵探，卒之「破案」？有內地記者問岸西可唔可以拍一部比較純粹既愛情戲，其實點樣先叫純粹既愛情呢，係灣仔，純粹租房既地方就有，純粹愛情就唔地除啦。
不過岸西話軒尼詩道呢條路係好有意思既，佢將灣仔分開左兩邊，北方，就係新填海，地方好靚；南方係舊區，係兩個世界，點解要揀呢度拍呢，因為呢度好似男女之間既關係，兩個人中間可能都有一條軒尼詩道，可能成世人都唔會過去，但過左去就係成世（永遠）。
都幾玄，關愛情乜事呢，我都係真係唔明！或者好多野都係咁卦，朦朦朧朧咁先至零舍好玩，睇得通通透透就唔多有癮架勒。唯有咁安慰自己啦，哈哈哈！