最近讀左一本論教育既著作，眼界大開。對比返香港教育，唉，見到人地車尾燈都當你贏啦。作者叫嘉麗絲（Karen Gallas），係美國既教育學者兼小學老師，佢本書就叫《The Languages of Learning: How Children Talk, Write, Dance, Draw, and Sing Their Understanding of the World》。書名係咪好長呢？唔好意思，因為我加埋副題。鬼佬啲書成日恃住有副題，書名就得個型字，睇完都唔知佢想寫乜，想知主旨反而要睇副題。唔好意思，扯遠左。
呢本書有講教育理念，亦都舉左好多實例去印證理念。點解本書叫「The Languages of Learning」呢？個「s」先係重點。小朋友認識外界，同表達內心，往往依賴好多唔同款式既「語言」。唔好誤會，佢呢度講既語言唔係普通話同英文，而係指講故仔、畫畫、唱歌、跳舞、做手工等等藝術。佢認為小朋友本來就有好豐富既表達手法，例如你要佢說明毛蟲化蝶既經過，佢可能會作段故仔，寫首詩，或者畫連環圖畀你，無拘無束。但大人往往認為呢啲主觀向既藝術係次要語言，偏好客觀、中立、無歧義、無預設、無感情、無紋彩既科學語言。所以你睇香港既中小學，美勞、家政永遠唔會做主科，英文堂唔會教你英詩英劇，只會教文法同文書處理技巧。咁做大大扼殺左小朋友與生俱來既表達手法。而外在表達同內在思維密不可分，你慣左點樣講野，就會慣左點樣諗野。表達手段削減左，睇世界既方式都會收窄埋。係呢個意義下，作者話大人既語言比起小朋友貧乏。我地吸收既資訊當然比細孥多。但資訊都係要靠語言黎分類同儲存。小朋友可以借助顏色、旋律、舞姿、比喻黎學習同表達，作者話佢身為老師，都經常係小朋友身上，搵返自己一度遺忘既語言，一度遺失既世界觀。至於大人，貧窮得只剩下共產中文同行政英文。我地連用顏色黎諗野都唔識，更莫講用顏色黎創作。你花大大筆錢搞西九，最尾咪又要靠買外國名作黎鎮館。唔好誤會，呢本書唔係主張學校開多幾堂美勞家政，唔係叫怪獸家長迫仔女報多幾堂油畫班拉丁舞班，而係若小朋友鍾意用藝術黎表達自己，由得佢，唔好急住糾正佢，阻止佢。由得佢既意思亦都唔係叫你唔理佢，你有你講書，佢有佢塗鴉，而係用返小朋友最親切既語言去同佢傾計，例如佢係科學習作上面畫畫，你問下佢畫左啲咩，點解咁畫，讚佢叻仔，你先會睇到呢個細孥既真正潛能。因才施教，原是古老智慧。
除左教育理念，呢本書重舉左好多作者既教學實例，令我呢個遠隔重洋既港仔都略略知下美國人點教小學生。其實單係略略知下都好震憾。我地印象中既學校，肯定係間開一間間課室，課室入面又排好一排排枱櫈，對號入座，秩序井然。作者話佢間學校，間間課室都唔同樣，甚麼未必要強稱之為「課室」，係廣場中心席地而座，係樓梯度排排坐，就已經上到堂。香港中小學教書，一定有課程，教育局一定會頒課程指引。老師只不過係傳聲筒，上頭叫佢教乜，佢就照辦煮畀學生食，學生擰頭就質佢食。但睇過嘉麗絲講佢點教書，你就完全明白民主國家既基礎何在。佢地都有課程，但此課程不同彼課程，完全係兩個概念。佢地都會編好幾點教語文，幾點教數學，幾點教科學既，但就無高層事先度好各科既課題，老師話晒事。老師就算有度過教咩，最終佢都交畀學生話事。你無聽錯，係學生話事。學生唔駛佔領教員室，就已經係課堂既主人。學生想識啲咩，老師就教啲咩。學生首先輪流講下自己鍾意既課題，然後討論、磋商、投票，最後選出一致贊同既課題。黎緊既課程，就係按住學生自選既題目黎編排。唔係塾師果種一言堂，亦唔係香港教員咁執行中央指示，而係地道既民主呀。舉返嘉麗絲既原例，佢班學生對古埃及文化好感興趣，結果古埃及文化就成為左佢地既課題。起初，老師幫佢地分組，分別負責鑽研墓室壁畫、古埃及文字、陪葬工藝品、衣物首飾、古埃及神祇、木乃伊、墓葬儀式等。佢地想知木乃伊點整，老師就叫佢地真係夾份整件木乃伊出黎。整下整下，興趣愈濃，結果一個月後，佢地一致決定整埋成間墓葬室。你負責油壁畫，佢負責揼棺材，你負責寫象形文字，佢負責整黃金面具。又過多一個月，墓葬室終於落成，結果佢地提議排一場話劇，模擬古埃及既墓葬儀式。送葬者灑土，祭師念禱文，守護神搖鈴，各司其職。呢堂古埃及課咁就玩左四個月。我有理由相信若果間學校夠財雄勢大，班大帝起埋金字塔都得。
佢地教自然科學，都寧舍有睇頭。香港老師就梗係讀教科書啦，其實學生夠勤力，自己咪晒成本書，個老師都抌得。嘉麗絲既科學堂，唔會齋講現成既科學發現，而係要學生提出佢地感興趣既問題，再一齊討論，一齊決定黎緊教啲咩。例如：
電力點黎？
乜野產生風？
恐龍點死？
人點樣發現火？
人點樣學識寫字記事？
結果嘉麗絲話，黎緊幾個月，我地就順住次序，逐一解答呢幾條問題。小朋友當然唔會馬上知道答案，而要先自己試下答，慢慢傾。例如有人估我地跑步會產生風，當呢個世界好多人跑步，所產生既風就會匯聚成大風。有人反駁，喂冬天無咩人跑步喎，但重大風左呢。當初既「理論」就要修改：哦，唔係跑步形成到有風既，貨車火車行咪一樣有風。雖然佢地未必估得啱，但經過呢一番切磋，佢地就親身體會左何謂科學。科學，唔再係無上權威，而係經過假設、論證、反駁、修改既思想流程，係人基於切身經驗，想像、組織、驗證而成。香港家長或者會問：傻的嗎，這樣做對考試有甚麼好處？
無錯，我係大鄉里出城。呢啲咁既「課程」，人地外國都行左好多年。但唔好意思，我呢個坐慣課室考慣試既港仔，真係好少聽。聽聞美國都好多蠢人下，我都唔清楚，究竟係嘉麗絲教得特別好，定美國一般都係咁教。呢啲留返畀讀者研究下啦。我剩係諗起啲教育學者成日話，學校係社會既縮影。咁香港既學制又係有幾分似獨裁政府既。