文：黃永志
平時經常OT夜左放工，一班人都會去附近的街邊食肆，在露天地方搵張台叫個宵夜食。好似旺角咁，可能都會去下砵蘭街或花園街一帶食下小菜、潮州打冷，又隊下啤，吹下水，係忙完一日工作後解下鬰悶咁。這是每個香港人的共同日常生活。不過，這種生活以後可能慢慢會消失，究竟在香港仲有什麼可以選擇？
今日曾德成的民政局，竟提出要向街邊食肆一有阻街就當場即罰$1500。可能民政局長曾德成唔理解香港人的生活，竟然覺得這種香港人的生活，係等於「亂拋垃圾」、阻街、唔乾淨、唔衛生，想在未來對這些街邊食肆即場向違規的店舖或食肆負責人發出定額罰款告票，金額可等於亂拋垃圾的$1500，最高甚至$5000。
曾德成係唔係想搞到香港唔和諧先
如果現在連僅有嘅夜市街頭小菜都被曾德成趕盡殺絕，咁我地仲可以去邊度食度個種風味？仲點可以食到個種氣氛？一間要係街開台的食肆，一個月可以賺幾多？賺得多咪又係交返去租金個度，然後突然話要罰你1500大元，真係唔知要做多幾多張台先為到本。所以，一係個老闆以後唔係街邊開台囉，一係就照開，但食環署同差佬都會黎嘈你，最終，咪又係煩到個食客同個老闆。
大家諗下，以前有好多街檔小販，大家行行下街肚餓都可以叫返串2蚊魚蛋、又平又香嘅雞旦仔食下，現在已經無哂，連魚蛋都要成10蚊串，仲可能要在港鐵站幫襯連鎖嘅，仲可以咁易搵到個街頭小食嘅氣氛咩？ 要怪就怪政府以前為左谷高個地產市道，而推哂啲小販去逼佢地去租個種貴好多嘅舖位。所以街頭小食已經近乎絕跡，除非你比得起好似銅鑼灣名店個租金咁，50萬一個月去租個魚旦舖黎做。
仲講自力更新？
曾德成，梁振英，你地仲好講叫香港人自力更新？人地小販自力更新就被你趕盡殺絕，現在輪到趕盡香港的夜市？
曾德成罰大家1500元，根本就唔係阻唔阻街的問題，而係想將我哋嘅僅有空間都扼殺埋，想啲特色夜市都打殘埋，將現在的食肆舖位，都變成「高增值」的名店賣手袋、賣貴錶，只有連鎖壟斷名店先有資本租得起。到頭來，香港只會得返個種所謂最唔影響市容、最衛生、最易管理嘅McDonald、KFC、吉野家等等。
你想這個惡夢成真嗎？