題為編輯所擬。
【歡迎開心些】選區劃界黎講，畀樣荒謬絕倫嘅野大家睇下。
話說，2011年嗰陣，李鄭屋選區人口跌落下限，所以夾硬劃左一棟舊蘇屋邨茶花樓畀我填番條數，自當時起，我地李鄭屋選區就喺嗰個位突左一忽出黎。去到2015年選舉，由於當時未完成蘇屋邨重建，所以嗰忽對選區嘅構成零影響，當時亦都無劃番呢忽走，由得佢留喺度。
去到今年，李鄭屋選區再次跌落人口下限，選舉事務處沿用「盡量唔郁」嘅原則，劃左喜雅、寶華閣、嘉利閣畀我地李鄭屋區填數，呢個都係可以預料嘅改動，但係佢無郁番蘇屋邨嗰忽畀蘇屋新選區，問題隨即浮現。
2011年蘇屋邨劃畀我嗰忽，係貼住舊蘇屋邨茶花樓嘅座落位置而劃嘅，而新蘇屋邨茶花樓嘅設計同舊嘅差天共地，連條路都改左位置，但條界無改到喎，咁變成點呢？ 變左而家嘅選區劃界，係將新蘇屋邨茶花樓橫劏左一刀，其中四份一歸蘇屋，四份三歸李鄭屋。
F17李鄭屋區為2011年的選區劃界
F21李鄭屋區為新公佈的選區劃界建議
喂講真，官僚都唔係眯埋眼咩都唔理就出個劃界架嘛？咁你叫新茶花樓啲街坊點投票呢？唔通要搞到同一層樓，11號單位前屬蘇屋選區，12號打後屬李鄭屋選區？即係同層樓11號阿陳宅同12號阿李宅係兩個選區？係咪傻架？
好心選管會，蘇屋邨嘅樓就畀番蘇屋邨啦，蘇屋邨有佢獨特嘅社區問題，李鄭屋同蘇屋根本隔左兩條街，係兩個唔同性質嘅選區黎架，唔好咁官僚啦唔該。