題為編輯所擬。
可能對香港的重新認知太過震撼，剛剛嘔了出來。一路嘔一路諗兩樣野：
1. 白衫黑社會不是被警方驅散、慌不擇路的示威者。
它們尋晚10點左右大舉進入西鐵站肆虐，必然是有組織、有計劃下刻意的選擇。可能係為了俾個藉口它們在公安部的黑警同事，當時最精銳的警力都在香港島，在元朗調動警力有困難等等。我唔知。
但既然有計劃，它們無可能唔知，10點鐘時最激烈或最會「搞事」的示威者，都正在中上環與警察對峙。
咁即係話，它們的暴行，從一開始的目標就是相對較和平的示威者。
換言之，它們（和背後指使的政權）的目的，不是對所謂「搞破壞」的示威者不勝其煩，而是要懲罰、繼而阻止所有膽敢用任何方式（即使和平、合法）表達有異於官方主張的意見的人。
極權要的，是字面意義上的一言堂，所有反對聲音都必須消滅。
2. 仍然係想講返一般「武力」同「暴力」的分別。
示威者過去一個多月不時有使用攻擊力頗高的武器，技術上好難唔係非法武力，這點無庸置疑。
但如果將佢地的武力置於當時的實際情況睇，你會發現示威者極少做先出手的那一方；事實上，示威者亦無「圍捕」警方的動機。通常係警察開始推進，然後才會有掟磚掟鐵支的狀態出現。
同時，容許我重覆，示威者係「掟」磚、「掟」鐵支，而唔係攞住磚頭或鐵支，repeatedly咁打警察個頭。
掟得出手，除非你係神槍手對自己的準頭好有自信，否則一般主要目的都唔係要傷害對方（當然你可以話係罔顧對方有受傷害的可能，但呢個唔係動機），而係要阻止對方前進，或驅離對方。
呢個其實都好容易理解。任何有同理心的人，除非義憤填膺，否則好難用手攞住武器，主動、連續地，直接對他人造成痛楚和傷害。施加酷刑，係要預先心理建設，唔係個個都隨便做到的。
講咁多，其實我意思不過係：尋晚的白衫黑社會，是泯滅人性的禽獸無誤。