攝：獨媒記者 Gundam
林鄭唔傾，戰事又遭拖長。大家仲要撐幾耐，真係好難講。不過香港人就係有個「袋住先」，樂於不切實際嘅劣根性。明明去飲，係祝福一對新人，一個二個淨係掛住乖乖地坐喺到問幾時有得食；明明大家都喺同一個禮拜出來抗掙，居然可以放過金紫荊等人哋張五星旗同太陽一齊照常升起；明明乜都未爭取到，就喺到議論戰功，話邊個威過邊個，鬥打卡多映相多在場證據多用來攞威攞彩收割光環；甚至開始離題，忘卻佔領嘅初衷，咁香港村民就會覺得活動變質，覺得諸候割據爭權互鬥，「為佔而佔」，減少支持。
首先，大家真係要認真回顧一下當初係為咗做咩走上街頭，死守三個據點。在下認為，在場每一位參加哩次遮打革命嘅人，都唔應該係要證明自己嫁/娶得過先來抗爭，抗爭嘅目的更加唔應該着意要喺身上留下戰㾗待他日圍爐時展示傷疤之用。為嘅目標，就係一個有公民提名嘅真普選。當然，在下亦無可否認旺角一點最為險要，眾死守旺角之勇士功不可沒。唯今次抗爭，乃係全民之事。不過就算全民參與，都唔係全部人都可完全放下世俗凡務，投身最主要戰線。其中有部份朋友，只能司職防務後勤：據點防守範圍之大，無人通風報訊，廣傳戰情，眾戰士未必可以迅速反應配合；再者戰事又因膠人誤事，拖延日久，如無人連日按據點所需運送水糧雜物，抗爭將有彈盡糧絶之虞；再者，眾生事暴徒有備而來，持械使橫，一眾緊守崗位隨時候命嘅救傷人員亦不可或缺。無論喺今次抗爭中扮演邊一個角色，大家都好重要。
再者，遮打革命到現時為止，群眾手上三個據點，每個都有唔同嘅氣氛，都有唔同嘅難處。今次抗爭，係背水一戰，三個據點，一個都不能少。叫大家退守剩金鐘一個點或者撤離，唔使問啊貴都知道係下下策。不過就算旺角戰況激烈，旺角個場幾有創意幾咁好玩同藍絲帶周旋幾咁刺激，為哩場革命接二連三創造佳話，都請大家莫要太過心高氣傲，亦無謂過份褒揚、放大旺角，為單一據點徒添多餘嘅價值同光環，會令大眾忽略其他要塞，減少關注同支援，待眾暴徒與偽糾察借機破壞其他據點，危害大局。
諸君須記，無論任一抗爭者於今次抗爭中扮演乜嘢角色，守邊一個據點，都一樣重要。每個上街抗爭之人，都係真心為真民主真普選出力之人；每一個據點，都係重要嘅談判籌碼。雖然唔係每位抗爭者嘅行動價值係一樣，唔係每個據點都有同等份量，但係請大家記住：抗戰未完，每一個崗位都同樣要有人去當值，每一個據點都要有人守住，唔好一時鬆懈，疏於警覺局勢之變化；或者貪威好勇，走去多人關注嘅地方「黏金糠」打卡攞彩，令其他崗位嘅人力減少；更加唔好喺未有新突破，抗爭未有實際結果時私怨上腦，內鬨批鬥，圍爐取暖，私自扯開主題，甚至互相攻奸，組織小圈子刻扣物資排擠其他組織，拖累戰友，只會打開被突擊清場嘅缺口，由內部開始，展開革命失敗嘅序幕。
最後，容在下班門弄斧，學香江新健筆之一嘅蕭少滔，做下「八股佬」，講個故仔：
又話說大約喺公元189年，董卓專權，把持朝政，十八路諸候決定「自己嘅朝庭自己救」，以護國之名義，發起「討董革命」，「佔領洛陽」。
救國大事，群雄盡出，睇落真係冇得輸，仲嚇到董卓騰哂雞，係走定守，都搞到董卓哩頭廢咗啲大臣又果頭重用返，哩頭殺咗啲人果頭又後悔，真係食又食唔安，瞓又瞓唔落。最後決定離開之前，仲要攞市民做炮灰，燒爛洛陽。
之不過呢，哩十八路諸侯實際上，除咗曹操、孫堅真係走去同董卓軍周旋，由損兵折將慢慢攻到入洛陽，其他諸侯做得最多嘅係乜？一係食花生；一係就嘻哈耍樂飲酒吹水；再唔係就玩真人版三國鈠，互相猜忌齊齊搵內奸，你殺吓我我又閃吓你，齊齊過河拆橋。其中仲有件粉人，叫袁術，佢見孫堅攻入洛陽，居然怕孫堅有戰功在身會攞哂光環，扣起孫堅啲糧草唔畀。
到哩一到，十八路諸侯美其名係護國，但係行動已變質，群雄各懷鬼胎，按兵不動，飲酒作樂，斷絶支援。明明講好一齊對抗董卓，轉個頭大家就開始收割光環。由爭取「董卓人頭落地恢復漢室」，變成各自圍爐取暖互相猜忌互數不是，個粉人袁術仲要為咗日後稱帝，私自奪取咗孫堅喺洛陽搜到嘅傳國玉壐，稱得上史上最無恥嘅成果收割器。十八路諸侯討董，就喺哩個情況之下，冇功而還。飲酒嘅有飲酒嘅開心，收光環嘅有收光環嘅快樂，之後齊齊散水。
總之，就係成班諸侯戇鳩鳩，董卓繼續生勾勾，至於漢室？當然係恢復無期啦。
歷史嘅教訓係人類係會重演歷史，但係麻煩請大家令哩段歷史唔好再次重演，唔該。
