不理靠嚇無用。
不理戒煙服務無人用。
不理加熱煙周街都用。
緣份到了，煙民自然會消失。
香港政府嘅控煙政策，來來去去都只係得一招，就係靠嚇
就好似細個既時候，你阿媽會嚇你：「講大話，甩大牙啊！」
係既，如果你係三歲細路哥，你可能會信。但係如果你阿媽連續同你講咗二十年，講到你智慧齒都出埋，你仲會唔會睬佢？
恐懼訴求幾時有效呢？就只有係阻止一件事開始既時候先有用。
對於未食過煙既人黎講，食煙係一個未知，你先有機會去恐嚇佢。但對於已經吸煙多年既煙民，你當佢地仲細咩，仲會理你煙包上面張圖？
張靠嚇圖冇用，咁政府既戒煙服務又有冇用呢？
當政府自己都講有7成煙民知道戒煙服務，但就超過6成煙民都未嘗試過戒煙服務，更冇意欲嘗試。
不過，就住無人用戒煙服務呢個問題，政府已經諗到對策，就係去多啲吸煙區同垃圾桶宣傳戒煙服務。
我柳臣真係笑左出來。咁同去機鋪叫學生唔好打機，返屋企溫書有咩分別？你估有無人會睬你？
係嘅，買煙同去吸煙區個班人的確係你想搵既對象。問題係 你 SELL 錯 野 ！都咁多年啦，點解政府仲未意識到自己啲橋唔掂？
拿，係等現存煙民死曬為止之前，政府如果想要「無煙香港」，不如試下推無味無焦油嘅加熱煙啦。我柳臣無點你嫁，係香港仲未有得買嘅情況下，已經有好多煙民轉用左，證明煙民 BUY 呢套 。
做人不能太佛系，做政府更加要積極解決問題，煙民係絕對唔會突然消失。
不過，生命中有不能承受的煙，亦有生命中能承受的煙。
如果香港一定會有人食煙，好憎煙味嘅柳臣希望佢地可以全部轉用加熱煙。
但願政府慈悲，幫手推廣加熱煙，唔食煙嘅唔洗再受二手煙影響，食煙嘅又多個選擇兼唔洗益班私煙黨。阿彌陀佛。