5月12日星期一，亞洲亞洲的「歲月留聲」頻道突然停播《再見艷陽天》，《再見艷陽天》本來一日播4次，然後無啦啦cut 左，仲要播到賀生未打完仗返來搵返秀巧，你話亞洲亞洲點對得住秀巧？你可以想像一日睇開4次的師奶心理幾唔平衡。本來我以為無啦啦停播，蘋果動新聞或者環球膠報都會報導，再加以恥笑一下亞洲亞洲；但係停播左4日，竟然冇人留意同投訴。我終於都明白一間電視台的失敗莫過於，全世界都當你死嘅，連恥笑你嘅時間都慳返。
TBB 個《膠遊記》每日播，然後每日都有人投訴，好明顯，係有人睇開TBB，先會投訴《膠遊記》篤眼篤鼻。另一邊廂，如果唔係亞洲亞洲「輪迴」播出《我和彊屍有個約會》對撼《膠遊記》比人恥笑，我根本唔知亞洲亞洲八點半原本播咩。我成日懷疑亞洲亞洲，到底係唔係香港政府經營？亞洲亞洲將節目「永不超生」地重播，就好似政府咁日日不斷挑戰觀眾的底線一樣。
從亞洲亞洲停播「再見艷陽天」事件，再次證明亞洲亞洲管理層智商偏低：
- 點解好似「8萬5」咁，停播唔話人知？
- 點解停播要停哂一日個4次？
- 點解唔宣傳下亞洲亞洲個「MyAv」呢？
大廈冇廁所水，都有張通告貼出來話我知啦。 「再見艷陽天」點解話cut 就cut，又唔交代死因，你係個電視機邊緣飄D 字話我知停播都好呀。老實講，我每次「禁」過去歲月留聲，我都係「路過架渣」，而當你每次路過，見佢同一個節目一日播4次，你個心情真係好似玩uno，比人「+4」了無限野一樣，真係好無癮架。
亞洲亞洲係有「百思不得其解」的堅持，佢將《龍門陣》代替《再見艷陽天》，而《龍門陣》要好完整的重播4次，《龍門陣》係唔係好睇到一日要睇4次？點解一日唔留返一兩次《再見艷陽天》？起碼好好睇睇播到去大結局，唔好等《再見艷陽天》死唔斷氣呀。
TBB有個MYTV，如此同時，亞洲亞洲其實都有個「MyAv」架。如其一日播4次同一個節目，點解唔宣傳下網上重溫功能呢？貼心的亞洲亞洲，應該係擔心唔識上網的朋友仔miss 左個節目啦我估。
每次《再見艷陽天》的主題曲一播，我都覺得係唱緊比王維基聽，「無後悔心中傷了再愈，走錯冤枉的路，幾番苦苦掙扎又再跌到...」。到底發唔發個牌比佢？王維基真係好似玩緊大富翁嘅終極黑仔王，次次到佢擇骰，佢都一定踩中TBB 或者政府D 地罰佢錢，仲要罰親都一定係起哂樓嘅淺水灣價，唔係深水埗劏房價。「沒有最衰，只有更衰」，次次王維基抽「機會牌」都一定send 佢坐監，冇得玩。而最慘嘅，莫過於係王維基已經將將就就玩「大富翁旅行版」，搞流動版TV；你又點會估到都未出發，就比人逮解出境。
PS. 亞洲亞洲為左慶祝 「歲月留星精彩跨越500天」，所以「再見」左個「艷陽天」，《再見艷陽天》個英文The good old days其實好正，亞洲亞洲已經窮得只剩下「回憶」。新年冇直播煙花，佢播24年前煙花，我當特備節目，比機會我再望多次未填海的維港。《恩雨之聲》都重播，我當你為自己個台積陰德。無啦啦停播《再見艷陽天》，亞洲亞洲係唔係連一班懷緬過去的觀眾都要糟蹋同放棄？
（利申：好啦，點解我會知道佢停播，我必須誠實的承認，我就係窮得只剩下回憶的觀眾，我有追開《再見艷陽天》，就係miss the good old days 囉。）
文章載於姐死姐還在Facebook專頁