之前都提過，sharing economy呢堆咁既東西，絕對唔high tech。 N咁多年前已經有交換屋住，或者旅行短租間屋比人。咁科技在邊?就係個縮短配對過程，減少左時間同成本，又可以令規模大左。而呢一切，就係多得流動上網同智能電話，當然還有各種apps (冇apps的仲係咪智能電話?)。張五常話齋，交易成本貴呀，information is costly。
試想想，如果係以前(其實都唔係好耐以前)，可能你就係在歐洲某邊境小鎮的油站舉牌講自己去邊，而可能十米外有條友肯車你去你既目的地，但完全睇唔到你寫乜。 (話時話我見過疑似港人截順風車，舉牌上個目的地寫到豆豉咁細，叫人點睇?真係一葉知秋，唔怪得港女都愛老外)
帶黎既改變有幾大?不如睇下投資者點睇。有時我地講句no money no talk，但更加岩既係talk is cheap。廢柴評論員(如我)在呢度梗係寫乜都得，但人地真金白銀拎出黎就另一回事 (當然有啲係拎其他人的錢，又另一回事)
Airbnb同uber都搞緊上市前增資。兩間公司既估值，去到近100億美金。又黎啦喎，冇乜印象100億美金即係幾多嘛，只知係好多。咁比較下， Hyatt 或者Intercontinental 等酒店集團，都未有咁的市值。服未?
係咪好唔理性?唔知。但肯定既係樹大招風，但凡有新科技，有人得益之時，好多時無可避免有人損失。科技淘汰左好多工種，亦淘汰左好多公司。 Sharing economy亦不例外。
做生意，最唔想就係競爭。以上講的例子，就直接威脅世上相當醜惡的兩種行業:酒店同的士。交易既野你情我願，但有呢類服務，就令你發現，原來好多你想要既野，有其他人，可以用低過你而家比既價錢，提供到比你(原諒我呢種英文式斷句)。即係就算住酒店好值都好，其實好多野都係不必要既。而背後好多消費者比緊錢，補貼緊其他人。
可以預計到，有兩種最煩既人，就會出黎投訴啦。而我唔係講酒店同的士，呢度係「一種人」，簡稱「業界」，又多數比人抹黑為「既得利益者」。而多數最鍾意抺黑既，梗係第二種人，就係「政府」。
第一種當然可以理解啦，生意被威脅。咁但似乎出黎話「人地收一百蚊 我收兩百蚊你都要幫趁我」好難令人信服。所以，就唯有出兩大絕招。第一，就係安全。的確間屋可能唔知租左比乜人，又或者掉轉你租間屋都唔知係咪安全。同樣地坐順風車分分鐘比人強暴支解(唔好奇怪呀，早排就發生左一單)。
雖則，一般黎講，拎安全出黎講，都係為左掩飾生意受威脅。畢竟投訴既，一百個有九十九個都係「業界」，唔係顧客。咁有人投訴，政府當然要「做野」。
但更加現實既係，sharing economy，你班友，好似冇交稅喎?酒店要交稅，的士要交稅，但你租間屋比人或拎自己架車去載人，就收番「車馬費」，「非牟利」喎。安全都未必有人理，但唔交稅政府當然同你死過。
的確，對於個人的呢類行為，其實好多地方都唔抽稅，又或者太煩。短借間屋比人收番一萬幾千，或者車人入機場收番幾十，未必有人理你。怕就怕係會「變質」，變左集團式經營。
於是乎，其實已經講掂數。稅，當然係要交的。規矩當然要守，例如要求租房出黎的屋主每年至少要有四份三時間住在間屋(如何驗證?)。或者唔比短租，租親都要一個星期起碼，以防屋企變酒店。
衣食住行。有趣的sharing economy的例子好多都係「住」同「行」。 其實衣都有，衫都可以租比人。但至少見就係「食」。點解?其中一個原因因為食物易腐壞，所以基本上唔係好存在ownership。擁有層樓可以自己住，可以去做泡妞武器，可以博升值，絕對同租屋不同。 車就好少可會升值，一出廠一落地係咁貶。但至少開出街可以演野，亦可以用黎泡妞。
對食物黎講，ownership似乎冇乜意思。女仔會因為你有層樓 或開架靚車另眼相看。但，唔通我話你知 “我屋企儲左好多長城牌午餐肉”? 咁當然食物都有可以升值既，陳皮咯，紅酒咯。但同時間，你又唔可以拎比人用嘛。 除非你係搞個導賞團。絕大多數情況下食物就只係直接使用， 食一忽就少一忽。唔係好似間屋或間房咁，租借比人一排唔會少咁忽肉。
講到呢度，我開始明明地點解 外國能香港不能。 我唔係幾信服話 香港的市場太細。 香港夠哂多業主，而同時間，Lyft呀uber呀之類，好多時都只係自己城市，個市場又會有幾大?唔好忘記好多地方甚至冇香港咁多人坐的士，因為香港的士費著實相當平。
最主要係，香港人?就最緊要「火中花香且燙 抓緊它 一於要得到」。自己有既?梗唔好同人分啦。唔好諗住比錢就分比你。甚至係我比埋錢都要人唔好分比你呀。 黃子華的魚蛋論實在到肉。你諗下，幾多香港人肯借架車比陌生人? (well，特別係諗到條友可能在上面車震個索女，而你係一個有車但泡唔到妞的宅男)。 更加唔好講借間屋比人搞，literally。 此話非虛，之前就有位airbnb屋主發現，佢間屋比人拎左黎做雜交派對。
香港人對處女可能冇乜迷信(有云要想搵處女，要去幼稚園)。但對於層樓的潔癖就好緊要呀。聽過唔只一個人講要買一手樓，噢，就因為唔想個馬桶比人坐過。 (而其實二手樓你大可以扑爆上手個馬桶)。 而最得意係佢地以為一手樓真係「一手」。陰功，你覺得裝修工人會落街搵洗手間? 你不如諗下佢有冇洗手，洗完手摸去邊仲好。 而其實層樓未賣比你，個馬桶都唔知幾多人坐過啦。 聽行內人士講，佢地啲行家最鍾意用人個馬桶，特別就係啲豪宅 – 因為自己買唔起嘛。 有啲更加激既，鍾意在人地間屋「拜四角」添。你懂的。
所以sharing economy，重點都係sharing。唔肯share，就冇乜economy啦。 咱們香港人的劣根性就係自私嘛。鬼佬就唔同啦， 絕對唔介意share – 你睇近排大熱的 蘭桂坊鬼佬港女片就知啦。