文：小草
小草作為一界草民，對議會內部的事情不了解也無大興趣。
建制派加埋功能組別人多，無論投咩都贏硬架啦。泛民呢，投親票都輸，咁咪唯有拉下布囉，咁佢地都有佢地的選民要交代。循環死結，無咩意思。不過，唔鐘意還唔鐘意，都要講下道理，論下事實，唔好侮辱我地啲基層市民的智慧呀嘛，嗱，如果話睇番呢篇報導，就真係漏洞百出囉。例如：
1) 「助長」？ 個大標題話拉布會「助長網上罪行」，但內文中，保安事務委員會的主席葉國謙話，就算拉布都不會妨礙新部門的日常工作。咁點解方向報個標題可以係「助長網上罪行」？既然上唔上立法會都可以運作，咁都唔係好緊急啫 ，查實只係改個名，升下格，某阿頭可以升職加薪，對街坊都無乜影響喎。 唉，唔100%企哂係政府果邊就係「助長罪行」，咁我地成班親朋戚友街坊鄰里，都覺得政府由得樓價高企唔對路，係咪全部變哂「阻礙經濟發展」？
2)「密謀」？ 開頭一段話泛民「密謀」就差人某個部門升級而拉布，咁既然係「密謀」，點解建制又知方向報又知？如果泛民為討好選民而拉布，咁拉布一定要公開啦，「密謀」來做乜呢？篇報導後段仲講到創科局的會議，陳偉業都公開講諗住點拉布啦。
3) 新部門有無新任務? 葉國謙就話個警察部門唔升格都不會影響運作，報導尾尾就講左一句泛民係擔心「新設的調查會巡查網上不利政府的言論」，威脅到言論自由。咦，咁到底係咪真呢？想砌泛民亂講，咁咪報導下新部門的權責範圍「證實」佢地亂講囉，但…成篇都無報導喎…
咁又係，方向報成日幫政府講野，只在小民生事務上偶而輕輕批判一下政策，就算有咩限制言論自由的任務，都唔關佢事。呢，好似亞視咁，平日成日幫政府講野，搞到牌費又唔交，糧都唔出，勞工處都拖咁耐唔告佢，咁就大家心照啦。