文：周回
上期刺青刊出了史兄的專訪，與這位人氣網絡作家談情說愛，分享他對婚姻、愛情的見解。史兄一直自謔自己的文章「多粗口」、「多錯別字」，最近熱爆香港的文章〈澳牛的黃昏〉也被冠上潮文之名。然而，閱讀更多史兄的作品，你會發現他只是用低俗、酒色財氣、粗口和幽默，來掩蓋自己深藏的理想主義和對世界的獨到見解。好像〈澳牛的黃昏〉一樣，表面寫食評，實際寫社會，寫香港，絲絲入扣。訪問當天，三位記者除了跟史兄暢談愛情，其實還分享到對社會時局的精闢看法。例如大家是否知道，《婚姻這種邪教》一書的收益將全數撥捐佔中？今期，讓我們看看史兄於愛情以外的想法。
問：點解支持佔中？
答：因為我覺得呢樣嘢係值得支持，係應該要做。
問：你相信佔中係可行？
答：其實中共係睇死咗（佔中）唔敢玉石俱焚，佔中呢樣嘢其實係玉石俱焚。你想透過㩒住香港班人嚟拎個經濟果實，佔中就係話你聽，如果你唔畀我，你就會損失個經濟果實。咁其實係最有效。同埋據我觀察，中共叫你唔好做嘅嘢，你去做就無錯。所以佔中本身我覺得係有用嘅。同埋呢樣嘢在我來說，係最後一鋪啦，如果無呢？就無啦。換句話說，喺2017呢次政治改革，其實係最後一round，有就有，無就無嫁啦。如果呢一round你無做尐嘢去換取你想要嘅嘢，你呢世都唔使旨意有，永遠唔會有。受害嘅唔係我，我頂多60歲命，但呢樣嘢遺害嘅係千秋萬世，好多人會結婚生仔，而下一代係無辦法選擇留唔留喺呢個世界上。呢樣嘢唔係單純自己嘅事，而我覺得佔中係最有機會成功。其實講穿咗，咪就係「曬馬」，邊個夠馬，咪贏囉。
問：但有人認為佔中有好多無聊嘅constrain，例如綁住隻手，你點睇？
答：係戇框嫁，但你調轉睇，佢係有尐形式主義嘅，佢要和平非暴力，咁你綁住隻手咪和平非暴力囉，佢想營造個效果就係我哋唔還手乍嘛。但我唔覺得呢樣嘢會令到個運動失敗，我唔會覺得因為呢樣嘢而令到個運動唔值得支持，咁樣推論會遠咗啲。
對我來講呢個運動係最後一個，無論得定唔得，我係當我還返啲嘢畀香港。因為我依家有嘅嘢其實唔係我自己，係納稅人、香港政府畀我嘅。我會覺得到咗呢個位，我需要還返尐嘢畀人。無論得定唔得都好，我都會覺得，我試過。唔得，無辦法，我咪走，得，我都叫做做過嘢，唔係白食白住。可能你哋（指三位記者）太細個，未明白去感謝某尐人去畀某尐嘢你係幾咁重要。但對我來說，而家係一個好重要嘅時刻，呢個位係決定千秋萬世嘅，係要決定做尐嘢去還債。
我之前嘅諗法係得就得，唔得就移民。但經歷過呢一兩年令我覺得，得唔得都係要走。第一件事係王維基事件，第二係一連串嘅事令我覺得佢係想香港最終變成另一個內地城市。依兩樣嘢令我覺得呢個趨勢係不可逆轉，就算你有普選都改變唔到。
問：係因為中共力量太大？
係太全方位…太全方位啦。但我覺得，佔中都係要去，但個形式係咪佔中我就覺得無乜所謂，如果另一個人搞壇嘢出嚟係掂嘅，咪去嗰度囉。咁問題係無呀嘛，無選擇嘅話，我唯有係呢個。網上有好多人潑冷水，但問題係你有咩先，你都無，咁我覺得好多嘢批評無所謂，例如你話政府政策廢係ok，但呢尐社會運動上，你批評完無尐alternative出嚟，你就係搞破壞。既然無更好嘅，咁呢個就係最好啦，你無其他揀嘛！我唔會覺得好多運動係mutually exclusive，反而係相輔相成。喺呢尐活動上，太多人想自己意見被採納，而去jealous of同你主張相同，但比你更早提出嘅人。其實好多本土派，人哋越出名，佢哋就越jealous，所以你見我從來唔講左右膠呢尐嘢，我覺得好撚無謂。
問：但依家網上媒體有好多呢尐論述啊！
答：我自己讀econ出身，一定睇過張五常。張五常講過一句嘢令我印象好深刻：咁多年來，無人試過喺爭抝中，討論中得到過任何嘢。我幾buy呢樣嘢。所以我有個幾差嘅習慣，就係我唔中意去人哋嘅地方討論。我亦都唔太在意人哋點睇我，點討論。有好多嘢其實係閉門造車諗出嚟，而非討論出嚟。
問到這裏，史兄拿起湯壺，把史媽煲的瘦肉湯一飲而盡，訪問也接近尾聲。透過面對面的訪談，我們了解到在史兄文章不容易得見的政治權，社會觀。不知讀者在讀畢本文後，會否對史兄的文章有另一番解讀？
更正啟事：
感謝史兄指正，文章原句「其實我係睇死咗（佔中）唔敢玉石俱焚，佔中呢樣嘢其實係玉石俱焚。你想透過㩒住香港班人嚟有個經濟果實」有誤，實為「其實"中共"係睇死咗（佔中）唔敢玉石俱焚，佔中呢樣嘢其實係玉石俱焚。你想透過㩒住香港班人嚟"拎"個經濟果實」。謹此更正，並為文章的錯漏致歉。