我們知道核能好方便，但好少國家會話畀大家聽，用完嘅核燃料用完會去咗邊。而更加有趣嘅係，無人話過畀你聽，我地責任保存呢啲核廢料足足十萬年。十萬年，十萬年呢個數字係乜意思呢？紀錄片《Into Eternity》就同你分享一下。
核電其中一個無可解決嘅問題係核廢料。核廢料係用過嘅核燃料，與原本嘅核燃料相比，核活躍鈾嘅豐度依然有原本嘅七成以上（遠遠唔係消失或用清），而且，核廢料仲會有唔同同位數嘅鈈與其他核活躍元素。呢啲核廢料估計（約 2009 或 2010 年，電影製作時間）有兩萬至三萬噸，只需某個百份比釋放出大自然，個地球就唔再適合人住。即使只係極少比例的釋放，都足以令局部地區（例如幾個大都會）產生恐慌與生態災難。因為部分極度危險嘅核活躍元素有相量長嘅半衰期（例如鈈-239，由鈾-238 被一粒中子撞擊後衰變而成，半衰期大約 24,200年），所以科學家估計，即使係經處理過嘅核廢料都需要安置超過十萬年先可以解封。
處置
核廢料係唔可以由人類派軍隊永久看管的，十年、幾十年仲可以算數，超過一百年根本無一樣野係安全嘅。無人可以保證一百年內唔會有大型戰爭，事實上過去一百年就有兩次世界大戰，核廢料集中存放地點絕對可以變成軍事目標（只要有個人夠邪惡嘅話）。有人諗過將核廢料倒落深海之中，但深海乃生命之源，將核廢料倒落深海絕對係唔負責任到極。亦有人諗過用火箭將核廢料帶離太陽系，不過，如果火箭喺大氣層中爆炸，咁就係世界末日提早來臨，根本無人能夠承擔咁大個責任。
芬蘭個做法係搵個地方開個深坑，叫做 Onkalo，中文意思係「洞穴」，工程分四個階段進行，開始時只係開隧道，但之後會慢慢開放置核廢料嘅存放室，直至 2100 年，當最後一個存放室都用完後，就將唯一入口密封。本電影就以 Onkalo 為題材。
十萬年係乜野
電影舉咗啲例子解釋「十萬年」係乜野。耶穌大約於二千年前出世，而金字塔大概於四五千年前興建。但係，呢兩個數字距離「十萬年」重有好遠。十萬年前，稱霸地球嘅並唔係我地個人種（智人），而係尼安德塔人。十萬年前係有智人，不過為數就少好多。舉個例，被稱為全人類父系元祖嘅「Ｙ-染色體亞當」，有啲學家估計「他」只不過係六萬年前出世，而較新嘅研究都只係指「他」於十四多萬年出世。我地可以知道，「十萬年」對一個物種絕對可以翻天覆地，當時稱霸地球嘅尼安德塔人如今己經滅絕，而係呢個尺度下，全人類父系元祖卻唔係咁遙遠。（註：Ｙ-染色體亞當嗰例子係我自己加，但其他例子係套戲本身有。）
除咗物種變遷之外，氣候變遷亦可以好劇烈。現在地球處於冰河時期嘅間冰期，但係，十萬年前地球處於冰河時期嘅冰期（少一個「間」字），冰期比起間冰期遠遠嚴寒，智人（即我地）根本唔適應冰期氣候。就算智人可以避過絕種嘅命運，整個北歐都無可能住人，就算尼安德塔人比智人耐寒，佢地都無於冰期時嘅北歐地區活躍。現有嘅間冰期於一萬多年前開始，但最近三次間冰期都唔超過十萬年。正常嘅估計係，十萬年內會出現最少一次冰期。（註：電影旁白誤將冰期 glacial period 講成冰河時期 ice age）
我地無理由相信，我地智人（或叫人類都可以，人種就只有我地幸存）仍然可以保護好核廢料。核廢料嘅安置地點，必須於設計上是完全無需人類去守護，而且可以抵抗十萬年嘅變化。我地要享受核電，就要立即唸個方法，唔可以將個咁重大嘅問題留畀幾代後嘅子孫。
銅牆鐵壁
除咗物種變遷與氣候變遷之外，地球不時都有地震、海潚、火口爆發，各類變化都可以改變地貌，有乜野建築物係可以十萬年都唔變呢？原來 Onkalo 選址位於太古宙嘅花崗岩岩層，足足有十八億年歷史（地球只有四十五億年歷史），咁罕有嘅岩層都俾佢搵到，我真係要服咗芬蘭政府，咁樣的確係可以抵擋十萬年嘅銅牆鐵壁。
但係銅牆鐵壁只可以抵擋天然災害，如果幾萬年後有智慧生物要入去，單靠天然堡壘係守唔住嘅。我地應該用乜野方法阻止（生態災難）呢？
忘記定係警告
對於阻止入侵嘅策略，各專家有兩套好唔同嘅觀點。
一套方法比較簡單，就係忘記 Onkalo 嘅存在。事實上，芬蘭政府打算於 Onkalo 封口後，就地遷移人口居住，好似乜野都無發生過一樣。Onkalo 嘅核廢料放得好深，一般嘅人類活動根本去唔到。呢個講法好似好嚇人，始終都係空城計，但大家睇落去先，就知道「忘記」唔係白痴嘅方法……
另一套方法係放置警告識別符號。但作為一個十萬年可被識別嘅符號（或文字），它應該係點呢？唔好講十萬年，睇睇幾千年嘅建築，如果幾千年後嘅人見到標語並意會到「內有危險」，佢地會唔會乖乖地遠離（先撇除盜墓賊唔講）？佢地會唔會以為呢個地點係宗教聖域而派考古學家大舉發堀呢？核廢料嘅廢害無色無味，我地有乜把握相信佢地知道危險性呢？
有專家提出，用世界各地不同嘅警告文字，加入 Onkalo 入口必經處內，並詳細解釋。但係我地不如反問，我地睇得明金字塔內嘅文字嗎？
最後被接納嘅專家意見係，只採用抽象的圖案作為警告，因為其他方法都好明顯唔得。用抽象的圖案係有用，的確有符號可以普世性表達「危險」嘅意思，但係內容一定無法確實。易地而處，如果我地搵到一兩千年前嘅噁心符號，我地會點唸呢？其實我地唔一定會重視，可能只視為玩咒符，或者係「此地無銀三百兩」。
法律畀後世嘅負擔
在法律上，後世必須定期保存與更新 Onkalo 的紀錄，至到永遠（至少是芬蘭亡國前都必須生效的）。呢一種法律係好難處理嘅。
訂立對後世有影響嘅法律有三個原則，確保我地對後世負責任而唔係連後人利益都剝奪。一，我地唔能夠用法律增加後世嘅長遠負擔；二，我地唔能夠用法律令後世嘅生活條件低於現世；三，我地要以法律確立把重要知識（包括已知極度危險的事物）傳給後世嘅責任。
以上三個原則全部都合情理，但處理 Onkalo 要合乎以上三個原則，就唔容易。原因好簡單：我地為咗享受一百年核電，而要後世（可能是數千年或數萬年）承擔極為長遠嘅法律責任，實在沉重到唔成比例。
其他
未來我地很可能需要更多 Onkalo。
之後片中有一堆近乎爆笑嘅對話，有官員／專員既唔可以答「Yes」又唔可以答「No」，口形扭曲難睇。
====
其實芬蘭政府肯成立專家小組處理呢個問題，都算好過好多國家啦。我根本無聽聞其他國家有處理過呢個問題，其他國家嘅情況普遍都應該更恐怖。
鄰近國家（例如日本、中國、台灣等）將核廢料放係邊度，用乜野警告符號同法律態度？我真係唔知。呢個實在好頭痛，除了技術上唔可行，三國都有各自額外嘅困難令佢地根本無法妥為處理核廢料。
鳴謝：本片播放由反核之眾提供。