歷史喺完全無教育意義嘅。
你話李光耀做得好，所以亞洲適合獨裁式政治。
計我話你要搵個治國良才唔難，最難係佢點樣可以唔喺權力下腐化。
我唔係讀歷史嘅，但我都可以勉強話俾你呢幾千年中國人點過。
秦始皇係治國強者唔洗多講。一系列嘅政治革新、經濟統一同基建影響直到今時今日。秦始皇瓜咗之後秦國維持咗幾年？四年。
- 唔會代代獨裁者都係明君。一遇到個廢少少嘅，人民就要食屎。
漢武帝被評價為中國歷史上最偉大皇帝之一。但好大喜功，晚年打仗打得太犀利，民怨極大，差啲收皮。好在漢武帝都係醒目仔，有人起義識得反省，唔係嘅話大家背西漢史背少一百年。
- 幾叻都好，性格都唔會一面對地好。你要有嘢制衡佢嘅權力，佢先識為民諗吓嘢。
唐朝盛世嘅除咗有發明活絡油嘅唐太宗之外，仲有唐玄宗。之不過開元之治係佢，安史之亂都係佢。識咗楊貴妃呢個肥婆就亂咁嚟，仲搞到自己條女都保唔住，好心啦。
- 每個人都有弱點。太平盛世無嘢好做都可以係弱點。而一放縱咗，係成世都翻唔到身。
宋朝呢，其實超強，但最出名嘅係一班屈屈不得志嘅文人。大家都好憎果篇岳陽樓記，就係寫於范仲淹俾人炖冬菇；王安石又係皇帝唔信佢。
- 有班勁人又唔識得用，獨裁好，獨裁好。
明朝不得不講萬曆。廿八年唔做嘢，完全無事。打仗又贏國泰民安，點解？因為明朝制度係中國咁多個朝代入面最民主嘅。當然明朝嘅民主同今日我哋講嘅民主係無得比，但喺當時封建社會行內閣制係相當前衛嘅。
不過畢竟唔係真民主，任何事最終決定權都係皇上。你有個溫和嘅萬曆就還好，一遇到個戀母情意結嘅熹宗同獨斷獨行眼高手低嘅崇禎又係仆街。
- 合理制度唔跟，自己走去獨裁，結局都係奶嘢多。
最後清朝，乾隆其實同唐玄宗差唔多，都係做做吓痴鬼咗，文治武功，真係要睇一世。人哋都仲叫為咗個女人，乾隆對和珅咁好都唔知有乜不可告人嘅秘密。
- 中國人用幾千年話咗俾你聽獨裁嘅後果，點解仲要唔信？
當然成篇文嘅歷史都係細個學/上網睇/電視睇返嚟，完全無經任何嚴謹嘅求證。中史我中三之後就無讀啦，所以班門弄斧唔好見怪。大家見我講錯不妨指點一下。