Sharing economy， 上 – 「食得唔好嘥」，「反正比左錢」。
近期，甚至係近年，科技股係當紅炸子雞。而亦好老土地講句，科技的確改變緊我地既生活，由硬件到軟件，由三星蘋果到Google，手機遊戲到淘寶團購，夾錢拍戲(kickstarter?)到上網搵女朋友。當然仲有日日上的facebook twitter 微博，以及你而家睇緊既呢個blog。
科技股節節上升，而新股上市亦停不了。唔投資唔做金融都聽過阿里巴巴搞上市搞到滿城風雨。大把錢都未賺的科技公司(例如twitter)都成功上市cap一大舊錢。
當然，呢個時間專家(特別係冇買到果啲)就會同你講「泡沬」呀，不理性呀之類。同你講番當年科網股災呀，8號仔呀，tom.com呀呢啲美好年代的東西。但一般的理性分析(唔理性仲叫唔叫分析?)，都話你知，同當年科網狂熱比，還爭很遠。至少你最多係見到個個宅男話去寫app，但未有好似當年李澤街IT Look之類的古仔。計數字，亦都睇到而家公司的各項估值， 同當年天價爭得遠。畢竟而家Google 蘋果之類的公司，係賺大錢的，唔係計 Hit rate。
不過本文重點唔係想講科網狂熱再臨，而係想講幾間近期(都唔止近期)幾有話題的公司，幾間公司打算上市，而估值，都相當「天價」-至少表面上係。
講乜?世界上唔止阿里巴巴的。講既係airbnb， uber同Lyft幾間公司。三間都未上市的美國公司，共通點就係，三間都食正”sharing economy”呢條水。
即係做乜?其實講出黎都幾low tech，絕對唔係你想像中既火箭工程。airbnb做乜?就係你間屋短租比人，可能係你去旅行間屋丟空左想租比人，或者係你去第度旅行想住人間屋。
「扯，咪即係民宿!」
至於uber同Lyft，更加簡單，都係sharing。 Share乜? 就係架車。
「扯，咪即係租車/坐順風車/泥鯭的!」
對， 儘管sharing economy呢個詞語好似係千禧年後先出現，但背後的東西實在絕不high tech。至少唔係好似智能手機呀，上facebook咁好玩。 Sharing economy 其實古已有之，但重要既係而家的科技比到個新的玩法。正如蘋果並唔係發明mp3機，或智能電話，或平板電腦。但佢就改變左個世界。
Sharing economy的精髓，就係「食得唔好嘥」，「反正比左錢」。聽落都開心，合符哂香港人的核心價值。而正如你估到，當然有人將以上呢類公司的理念抄黎香港啦。大陸都有打車app啦。香港都有，仲有租私家車，仲有租客貨van。
表面睇起上黎，好似由泥鯭的到順風車，到租婚紗到租碟番屋企睇(嘩，好浪漫好古典的行為!)，甚至係叫個菲傭去糖水鋪去飛髮鋪幫手，以致你叫公司個冇乜野做office boy的(又一old school名稱)幫你落去買六合彩，都好似係sharing economy。不過根據鬼佬的定義(我們還是跟鬼佬吧)，sharing economy， 就係fully utilize underused assets。我幾鍾意這定義， 字字珠磯。
留意精妙係fully utilize，即係渣到最後一滴，捽到盡(在公司睇緊既你深表認同，但其實可以比你上黎睇到呢篇文又有幾盡?)。另一重點就係underused，「食得唔好嘥」，國產淩淩漆話齋，就算就算係一條底褲一張廁紙都有佢嘅作用。
但最重要的係，assets。 sharing economy既精髓，就係「欣賞它不必要得到」「啱就一世唔岩就一季再唔岩就斷次計」。好多時，你要用果樣東西，並唔使擁有佢既。而同樣地，擁有果個，並唔係一日廿四小時都要擁有住，大可以比你用下。
所以以上的例子中， 租架車比人/兜人坐順風車就係sharing economy，因為架車係你既。但泥鯭的就嚴格唔算係。同樣地租緍紗租碟都係(固然產生左部份法律問題啦下)，但叫你個菲傭去糖水鋪就唔係，佢唔係你資產，唔係你奴隸，雖則好多人想做「被奪走的12年」(12 Years a Slave)甚至黑殺令(Django unchained)的莊主。 亦同樣地，點個下屬去買奶茶都唔係，雖則你公司成日話「員工係公司資產」。