咪喪買開張至今，遇上曾爵士突然登基事件，工作上的新安排忙到亂七八糟，結果平日的寫稿規律打到亂籠，現在終於可以安心寫一寫咪喪買。
各位女士們，妳們在買衫時，其實有沒有細心留意「名牌衫」的車工。個別牌子雖然貴，但歐洲製造果批貨手工好掂。相反，個別牌子中國製造，或其他無工會保障國家的貨，手工麻麻，得個貴字。
點解會係咁，大家先了解下所謂「名牌衫」點走出黎。
好多名牌衫，其實都唔係自己的廠去做，而係外判俾一些中小型製衣廠去做，而這些中小型製衣廠，再自己諗辦法完成訂單，亦即簡稱OEM。
而車衫，唔係一件唔駛用腦的工作。基本上，係一種手工作業。如果工人精神唔好，態度求其，咁車起黎的線頭就會唔好，甚至塊布好快出現走紗現象。QC？更加唔駛諗啦。
而在歐洲地區，由於工會有集體談判權保障，工時好少超長，歐洲工人亦不會超時咁同你做。雖然成本貴，但工人精神足，又有心機同你慢慢做，QC亦唔駛趕頭趕命檢查批貨掂唔掂，手工總會好一些。好似意大利，當地直頭有午睡制度，午睡過後精神好，你話意大利時裝點可能手工差？
相反，好似中國呢類工會俾共產黨打壓地方，工人工時隨時十幾個鐘計，要佢地手工仔細，你認為佢地係超人咩？做得十幾個鐘的公司，批貨一定趕頭趕命做。個個都趕住車，QC望兩眼就算，你想質素好，難矣！
所以點解要有集體談判權，唔係因為工人要偷懶，對時裝呢類講精細的工業，其實係保障工人質素。大家千祈唔好奇怪Armani Exchange、MNG呢些唔少貨歐洲出的牌子貴過人，你比較下由香港那些最愛打壓工會的大商界，在大陸投資生產果批貨的質素，你就知工會就係成衣品質保證。
千祈唔好只係睇牌子買衫，先睇件衫邊度做，比較下手工再俾錢都未遲。