最近喺社交網睇見唔少巴基斯旦人貼上手持寫住''save football in Pakistan''紙張嘅相片（或用後期電腦加工），雖然我第一時間諗起香港班藝人畀網民改圖惡搞由支持消防員變成支持林榮基，但細看下今年巴基斯旦喺國際賽係完全冇活動，上年年頭畀也門喺世界盃外圍賽首圈踢出局後巴基斯旦就冇參與任何國際比賽，連上年年底舉行嘅南亞足球錦標賽都退出埋，到底巴基斯旦足球呢一年搞乜鬼呢？
細閱多篇巴基斯坦網上英文文章得知Pakistan Football Federation（PFF, 巴基斯坦足球協會）呢一年內部處於分裂狀態，形成兩股勢力，一派係以做咗巴基斯坦足協主席十二年嘅Makhdoom Faisal Saleh Hayat（哈亞特）為首嘅傳統派，另一派由Arshad Lodhi(洛迪)及Farasat Ali Shah（艾里沙）合組搭擋被稱為改革派，大家為爭奪權力無所不用其極。由於哈亞特任職巴基斯旦足協主席多年巴基斯旦足球冇乜起色，加上又有腐敗事件發生，因此洛迪及艾里沙希望將哈亞特拉落台，之後大家就好似鬥爭式電視劇咁用盡方法將敵人收皮，看似一班有意拯救巴基斯旦足球嘅勇士向強權挑戰，但亦有人指兩股勢力背後有各有政治立場，根本就係一場政治鬥爭，拯救足球只係爭奪利益嘅藉口。
由於陷入分裂危機，國際足協亦有派人調停，並宣佈只認可傳統派嘅哈亞特為巴基斯坦足協主席，此後事件進入法律程序，大家展開拉鋸戰，因為咁足協無法正常運作，影響國家隊出戰，巴基斯坦足球超級聯賽亦要停辦。事件最大受害者當然係職球員，有多支巴基斯坦足球超級聯賽球隊因為冇比賽而臨時解散，唔少職業球員立即失業要轉行生存，只有少數喺外地搵食嘅職業球員可以避過一劫，例如效力美國足球聯賽（USL）Tulsa Roughnecks FC（塔爾薩鑽機工FC）嘅巴基斯坦國腳前鋒Kaleemullah Khan（卡翰）就係其中一位幸運兒，而卡翰接受巴媒訪問時提到巴基斯坦足協入面欠乏專業人士，但反對派陣容都係咁上下，佢哋亦冇理過球員死活，根本只係一場為個人利益而展開嘅政治鬥爭，佢只係怕巴基斯坦遲早會畀國際足協禁賽，影響埋海外搵食嘅球員。
根據印尼嘅案例，禁賽令生效後印尼球員係可以繼續出外踢波，只不過如果國內連聯賽都冇，可能有立心不良嘅海外球隊會向球員借機壓價。而巴基斯坦足運其實一向以來都受到大大小小嘅政治干預，所以仆街係遲早之事，但最慘係巴基斯坦足球喺巴基斯坦不太受巴基斯坦人重視，所以球員就發起一人一相拯救巴基斯坦足球大行動，希望利用社交網嘅威力去影響事件，講白啲就係希望多啲人知道呢件事令當時人受壓從而處理返現存嘅問題。
近十年巴基斯坦足球雖然搵到一班於海外出身，喺英格蘭、丹麥等地踢職業足球聯賽嘅球員返國家隊幫拖，但由於呢班球員質素一般，巴基斯坦喺國際賽戰績都唔係太好，而巴基斯坦足球超級聯賽只有個別球隊比較上接近專業水平，聯賽亦欠缺社會支持球迷不足，由於要節省開支，球員有時需要一週踢三、四場波，非常吃力。不過近一兩年開始多咗巴基斯坦球員被海外球隊賞識，有球員喺南亞足球錦標賽有好表現，因此可以去到吉爾吉斯、巴林、馬爾代夫甚至美國踢職業賽，對積弱中嘅巴基斯坦足球嚟講係一件好事，但隨住巴基斯坦足球嘅不明朗因素令環境劇變，一切努力可能會化為烏有。