雖然馬代喺世界盃外圍賽賽事中已經被港隊雙殺，現時佢地已將主力放喺南亞足球錦標賽上，但經過今次世界盃外圍賽，相信以往比較輕視馬代足球嘅球迷都會重新審視呢支南亞國家隊。但係馬代足球發展仲係受到好多因素影響，未來會否更進一步，連馬代球迷都話點知喎。
雖然足球係馬代最受歡迎嘅運動，但政府對足運發展支持有限，政府主要都係傾向經濟發展，而地域亦係馬代足球阻力，可用土地太少搞到正規足球場唔夠，令好多青年球員要喺路邊踢波，而地域問題亦限制咗馬代足球聯賽發展，但馬代嘅註冊全職本地球員可能比港超全職本地球員更多，只不過現階段大部分球員能力唔係咁高。
馬代唯一職業化嘅運動就係足球，因為馬代其實都幾多窮人，眼見拉迪恩、馬玆亞球員有唔錯嘅收入，唔少細路都希望試吓用足球脫貧，因此足協搞嘅青年選拔賽報名時經常人山人海，而贊助商Milo(美祿)亦有協辦有關活動(參加者有免費Milo產品享用)，唔少青少年盃賽都係Milo出錢搞，現時踢緊乙組嘅馬代U19就係Milo嘅''成品''，俗稱Milo戰士，而再睇睇成個馬代球圈，有唔少嘢同Milo都有關係，例如拉迪恩贊助商就係Milo，慈善盾亦係Milo贊助，Milo亦起咗一個人造草場及一個叫Fuvahmulah Milo Stadium嘅運動場。
而Milo喺馬代嘅代言人就係馬代冇人唔識嘅前鋒球員艾舒費(Ali Ashfaq)(香港俗稱馬代球王)，查實Milo都幾精知道足球喺馬代嘅影響力即時搵位入，先贊助最多人睇嘅拉迪恩，又搵埋知名度同總統阿明咁上吓嘅球王做代言人，再援助馬代足球，不停製造扶弱英雄現象，令Milo成為馬代銷量最高嘅飲料，其他相關飲料黎到馬代跟本冇得同Milo打，個普及程度同維他奶喺香港一樣。
但呢啲嘢當然係互惠互利，你幫我我畀你楝支旗黎搵食囉，馬代人口30萬市場好細，但Milo要做嘅就係要守住南亞其中一個根據地，而且Milo打入馬代市場顧客唔止係本地人，仲有千千萬萬嘅遊客，好似早排張家輝(門神Tom)拎住包Milo企喺馬代球王張代言廣告度影相，之後港足冰室貼上黎畀眾多茶客睇度，有茶客見到張家輝飲得咁滋味就叫冰室入貨，而我就即刻第二日收工去沙田托一箱紙包即飲裝返屋企，張家輝雖然羸球王，但Milo至係羸晒個位呢。
圖片來源：馬代足球網及港足冰室