印尼甲組完季，但乙組及丙組仲未完，其中乙組去到最後階，殺入最後4強嘅有PSMS Medan（棉蘭）、Persebaya Surabaya（泗水）、Martapura F.C.（馬達普拉）及PSIS Semarang（三寶瓏），根據賽規，4隊會爭3個升班位，而棉、三、泗3隊地方足球本身喺當地有一定影響力，如果呢3支球隊順利上到頂級聯賽，或將會刺激成個球市。而因為降班，有啲經典大戰已經漸漸被淡忘，包括1985年印尼業餘聯賽Perserikatan總決賽棉蘭對萬隆，若果棉蘭升班就會重演印尼其中一場經典大戰系列。
兩隊根據地唔接近，一個喺西爪哇，一個係北蘇門答臘，2地來回都要幾粒鐘機程，球迷間冇咩深仇血恨，不過1985年印尼業餘聯賽總決賽咁啱係由棉蘭對萬隆，比賽喺雅加達GBK運動場踢（中立場），當時場內可以容納大約12萬人，不過當時2支球氣勢好高昂，加上娛樂比現時少及主流媒體瘋狂宣傳下，最終嚴重超載，有15萬人湧入場收睇呢場比賽，即使只係業餘性質都冇影響球迷對比賽嘅渴望。
據稱入場人數係當時世界紀錄，但現時好難再好似85年咁火爆，因為GBK幾次維修後座位數目已經減到9萬以下，即使重現昔日戲碼，相信GBK頂盡5萬人入場，因為2支球隊經歷都唔同晒。