今晚舉行嘅印錦賽錦石聯主場對阿雷馬踢完喇，最終錦石聯爆冷小勝一球，而有千幾位阿雷馬球坐兩粒鐘車遠赴當地，見到呢個賽果相信都好失望，不這呢啲就係足球喇。而今場波因為係大戰所以票價都有變動，經濟票由15000盧比（港幣9）加到去20000盧比（港幣12），VIP位就收200000盧比（港幣120）。大部分人都係買經濟票，其實港幣120蚊對比返好多貧苦印尼球迷而言係好貴，但亦有畀得起錢嘅球迷寧買經濟票，唔係慳皮而係嫌VIP位冇氣氛！
而後日喺Maguwoharjo Stadium踢嘅國際友誼賽印尼對越南賣飛喇，有分三種VIP飛，西南看台底部係最貴要150000盧比（港幣90），西南看台上層要100000盧比(港幣60)，VIP東看台全數收50000盧比（港幣30），其他收30000盧比（港幣18），同上場一樣，友賽係唔會定太貴，但會因比賽重要性而定價，最貴可以去到500000（港幣300）甚至1000000（港幣600），而三年前對荷蘭最貴就要1750000盧比（港幣1,050），不過有時遇上印尼超大戰最貴嘅VIP飛亦可以去到睇荷蘭呢個價，亞洲賽亦會睇形勢收費，例如2011年亞協盃佩斯普拉對春武里最貴嘅VIP票要1000000盧比（港幣600），而對南華時因為有決定性所以最貴嘅VIP票就訂到去2000000盧比）港幣1200），1200蚊睇場亞協盃值唔值？見仁見智，但又真係有人買，吹咩？