港超同甲乙丙呢啲垃圾波未開，所以睇緊其他優良波解悶，搵到最近一場馬爾代夫超聯超級無敵精彩巨戰足本重溫，由Maziya SC（馬玆亞）對New Radiant SC（拉迪恩），精彩到睇咗唔夠兩個字就訓著咗。如果有留意香港球隊踢亞洲賽嘅球迷一定對呢兩支馬代職業球隊有印象，早喺90年代拉迪恩已經同香港球隊交過手，去到千禧年中拉迪恩更係香港球隊踢亞協盃分組賽嘅常客，間唔中香港球隊都會輸畀佢哋，而馬玆亞就係近年亞協盃常客，南華都輸過畀佢哋。
雖然VB變返業餘球隊踢低組別，不過近年馬玆亞、TC體育會、Green Streets（綠街）等職業球隊冒起，拉迪恩再唔係大晒，好似年初舉行嘅馬爾代夫超聯前奏2017 Malé League（馬累聯賽）咁，馬玆亞、綠街、拉迪恩、TC、勝利競技嘅積分都非常接近，大家實力唔係差太遠，再唔係一兩隊玩晒嘅局面，競爭比以往刺激同大啲。
各支球隊加碼後職業外援數目都多咗，綠街就向烏克蘭球員埋手，加盟嘅有效力過Chornomorets Odesa（敖德薩黑海人）嘅中堅Petro Kovalchuk，馬玆亞就簽克羅地亞小國腳Andrej Kerić，TC都有聖文森及格瑞那丁國腳Cornelius Stewart，拉迪恩都唔執書搵咗兩個有西甲經驗嘅西班牙外援幫拖。
而馬代最欠缺係門將，所以大部分球隊都起用外援門將，而且特別鐘情亞洲人，所以你可以見到吉爾吉斯前國門Ruslan Amirov、斯里蘭卡現役首席國門Sujan Perera，敘利亞前國門Mahmoud Al-Youssef同尼泊爾國門Kiran Chemjong、日腳東風淳等門將亮相馬代超，話唔定之後會有更多來自五湖四海嘅亞洲門將去到馬爾代夫踢波，就算係香港澳門球員畀馬爾代夫球隊mark實都唔奇呀，去馬爾代夫唔止係玩水同飲美祿咁簡單，都可以去踢波嘅姐，唔係睇完中國性幻想鳩吹馬爾代夫冇職業球隊嘅文章就以為馬爾代夫得街波踢呀嘛？