圖：2013年南亞8國隊長聚首一堂
依家馬爾代夫有史以來第1次獲得香港主流社會嘅正式關注，不過重點關注嘅並非馬爾代夫點解會搞到政局不穩，而係香港隊黎緊對馬爾代夫嘅世界盃外圍賽會喺邊度踢，比著昔日如果香港隊對馬爾代夫，香港市面肯定會進入WFC緊急狀態360天，今次撞正冇幾可形成嘅港足熱潮，令成個局面都唔同晒。
不過我就冇諗住喺到研究場波放喺邊度打，反而就想講吓馬爾代夫足球另一個神聖任務，就係12月喺印度南部城市錫魯萬納塔普拉姆舉行嘅SAFF Championship(南亞足球錦標賽)。
依家馬爾代夫喺世界盃外圍賽已經99%肯定排尾2(另外1個%就係不丹拎得多分個馬爾代夫或者中港是旦一方輸晒個3場波而馬爾代夫羸晒個3場波即係神蹟中嘅神蹟比睇香港隊要通頂排隊買飛更難實現)，可做嘅就係盡喺香港及不丹身上拎返啲分，老實講已經冇乜壓力，而馬爾代夫已經瞄準南亞足球錦標賽，會將餘下嘅世界盃外圍賽賽事擋係為錦標賽準備嘅熱身賽咁打，因此有馬爾代夫球迷就喺社交網提議倒不如教練團考慮選返多啲生面口，但究竟馬爾代夫會唔會因為咁而畀多啲機會新人喺餘下嘅賽場中磨練呢？
現時呢支馬爾代夫國家隊經常入選嘅球員有幾位就到30歲，好似後衛Akram Abdul Ghanee(加利)及中場Hussain Niyaz(耶斯)等都明顯有走下坡嘅壯況，呢幾位球員有可能好快同國家隊緣絕，或者係時候要搵返啲人接棒，反正馬爾代夫唔係嚴重缺球員，但如果硬推新兵上場但結果輸到仆街可能會有反效果，不過最緊要係睇吓教練團敢唔敢做，之前畀馬爾代夫足協炒咗嘅馬爾代夫國家隊主教練保加利亞籍嘅Velizar Popov(波波夫)早排帶隊去留尼旺參加印度洋島國運動會足球項目時，教練團就曾經選過幾位冇乜大賽經驗嘅後生仔入隊，雖然喺小組賽出局，但都贏過近幾次都做唔低嘅塞舌爾，當時波波夫話馬爾代夫唔係冇球員接班而係冇機會畀球員接班，此話一出冇耐波波夫就嬲住離開馬爾代夫呢個表面風平浪靜嘅印度洋小島國，有人就話波波夫同隊中某幾位有地位嘅球員本身唔多和諧至會搞成咁，但波波夫有樣嘢講得幾啱，如果有機會點解唔畀人試多啲呢？
若果想畀多啲新球員出場幫國家隊踢國際賽，南亞足球錦標賽係一個好平台，呢個錦標賽內嘅參賽國家之間嘅足球水平差唔多，今次馬爾代夫被編入B組，對手有不丹、阿富汗及孟加拉。
馬爾代夫雖然係出線大熱，但要睇睇馬爾代夫足協想點去行，如果想爭成積，或者會沿用世界盃外圍賽時嘅常規陣容出戰，如果想練兵就唔可以介意成積，因為對於馬爾代夫黎講派最強陣容都未必羸硬孟加拉。
而我就認為，馬爾代夫喺世界盃外圍賽餘下賽事選嘅球員都係咁上吓，而南亞足球錦標賽亦係唔會有太大分別，相信都係以冠軍為目標，暫時以成積為主。呢個錦標賽水平雖然低，但近年關注度多咗，今屆スズキ株式会社(鈴木)亦踩入黎，而南亞嘅國家喺亞洲足壇輸多羸少，南亞足球錦標賽就成為南亞國家圍內「飛機盃」，你以為WFC，你可能以為飛機盃只係用黎打飛機，但馬爾代夫不知幾重視，睇吓2008年拎冠軍全國狂歡慶祝你就知，相信唔係當地人係唔會清楚南亞冠軍個種重要性。