2014年馬來西亞超級聯賽（MSL）喺6月底打完，最近公佈嘅2014年馬來西亞超級聯賽入場人數，有7支球隊嘅場均數有增無減，一啲球隊升幅非常好大，究竟馬超聯下年會唔會更火爆呢？相信只有天知！
最多人入場睇嘅係2014年聯賽冠軍Johor Darul Tazim（柔佛DT），場均23,000，升幅+6.9%。柔佛足球隊幾年前嘅入場場均數不足3,000，場面慘不忍睹，但揾到新東家後脫胎換骨，重視包裝，引入過國際級外援比如前西班牙國腳古爾沙，前阿根廷國腳艾馬，製造唔少話題，成功令柔佛球迷及本已遠離馬來西亞足球嘅球迷走返入去足球場，亦令成個馬來西亞球市火紅起來，依家柔佛DT嘅主場氣勢好比南美賽場，好難相信幾年前柔佛主場只有小貓三四隻。
第二多人睇嘅係彭亨足球隊，場均21,545，升幅+7.7%。彭亨足球隊雖然冇咩突出成就，但地方歸屬感問題，一向有一定捧場客，近年馬來西亞球迷對馬來西亞本土足球關注度上升，亦令彭亨足球受益。第三多人睇嘅係升班馬砂拉越，場均16,818，呢支足球隊嘅根據地位於婆羅洲北部，係今年唯一一支東馬足球隊，一向有一定捧場客。
其實馬超聯之中比較多支持者嘅球隊，都係『州球隊』，比如柔佛DT，即係代表西馬來西亞南部嘅柔佛州球隊，彭亨即係代表彭亨州，吉蘭丹即係代表州。馬來西亞分咗十三個州，每個州有自己州歌，大部分州民對州有歸屬感，令州球隊較易吸客。事實上有地方性嘅州球隊係比冇地方性嘅球隊易著數得多，比如馬來西亞武裝足球隊，因為球隊冇地方性，就要用其他方法吸客，所以今季場均只有3,818。
2014年馬來西亞超級聯賽（MSL）入場場均數
柔佛DT 23,000 +6.9％
彭亨 21,545 +7.7％
砂拉越 16,818 +12.1％
雪蘭莪 14,909 +10.4％
吉蘭丹 12,727 -15.1％
霹靂 8,445 -6.1％
丁加奴 6,836 -2.3％
十二獅 6,093 -3.2％
森那美 4,082 +36％
武裝 3,818 -4.5％
PKNS 2,718 +43％
T隊 1,641 +21.5％
馬來西亞超級聯賽呢幾年多咗人入場，係一件好事，但馬來西亞足球係時候要諗諗，點先可以提升聯賽水平及『衝出東南亞』？我見到雪蘭莪對柔佛DT有成8萬幾人入場，証明聯賽係有得搞，馬來西亞球迷唔係只識睇英超，但只要稍有『出錯』，馬來西亞球市可以好快『變天』，以往馬來西亞球市也有火爆之時，但只係蕓花一現，每次俾打假波嘅負面事件拖累。