最近有篇網上文章題名為〈「我是尼泊爾人，也是香港人」──談談香港社會的種族歧視，那被冷漠以對的7%〉，內文提到喺香港出生嘅尼泊爾人飽受種種不平等待遇，引起網民討論，網民主要持兩極睇法，一邊就覺得呢班尼泊爾人自己唔肯容入香港社會，做咩我哋要處處遷就你？一邊就覺得香港社會的確對呢批少數族裔支援不足，令佢哋難以衝上上游。而我曾經因為足球、工作接觸過唔少尼泊爾人，都認同香港政府對佢哋支援有不足同埋香港種族歧視嚴重（但相比貪污大國印尼小巫見大巫），不過眼見有啲尼泊爾人明明唔係冇機會改變現狀，但因為有種認為''這些機會怎會是我們的''嘅心態而一開始就宣佈自我放棄，然後又喺自己族裔群入面圍爐取暖，拒與華人接觸，甚至認為華人都係鬼頭鬼腦，雖然唔係所有尼泊爾裔都係咁，但呢個問題只會愈嚟愈大，尼裔只會繼續被邊緣化。
而提起喺香港出生嘅尼泊爾人，都要扯到足球嗰度，若果有喺佐敦、元朗出入嘅人，可能會發現部分石地場經常有尼泊爾人踢波，有時仲會有整齊隊衣及球證，你睇到嘅可能係一個叫HKNFA Premier League（香港尼泊爾足球總會超級聯賽）嘅業餘七人足球聯賽。HKNFA並非香港神經纖維瘤協會縮寫，而係Hong Kong Nepalese Football Association（香港尼泊爾足球總會），喺2008年由一班主要喺香港出生嘅尼泊爾人成立嘅業餘足球總會，目的係向香港尼泊爾社區內嘅尼泊爾人推廣足球，並鼓勵尼泊爾青年加入香港足總旗下嘅球會梯隊，協助佢哋日後成為職業球員。
而HKNFA Premier League性質係業餘七人足球聯賽，上年有15支球隊參賽，包括Yuen Long FC（元朗FC）、Gurkha BOY FC（踞喀仔FC）、Sunday United FC（日聯）、Golden Star FC（金星FC）、Dharan FC（特蘭FC）等，其中元朗FC係HKNFA Premier League勁旅，有球員代表過香港尼泊爾足球總會去過尼泊爾參加當地大賽Budha Subba Gold Cup（佛金盃），一個有眾多尼泊爾半職業球隊及少量外隊參加嘅盃賽。
由2012年起，Hongkong Nepalese Federation（香港尼泊爾人聯會）協助香港尼泊爾足球總會派隊參加呢個尼泊爾足球界大賽，最初起用部分香港出生嘅尼泊爾球員及部分尼泊爾半職業球員組成一隊波，但戰積一般，到2013年香港尼泊爾足球總會再度出擊，今次以大部分尼泊爾大小國腳做班底，加三位喺尼泊爾搵食嘅職業外援再加兩位喺香港搵食嘅外援組成，而香港出生嘅尼泊爾球員就冇入選，代表香港嘅就變成喺香港搵食嘅兩位外援，即係Celistanus Tita（迪達）及Henry Baise（亨利），結果香港尼泊爾足球總會勇奪冠軍，成為史上首支稱霸佛金盃嘅香港代表。而同年10月香港尼泊爾足球總會再度派隊參加另一個叫Pokhara Cup 2070（博卡拉盃）嘅盃賽，今次就完全掛名，此後就再冇派隊去尼泊爾踢盃賽。
返到香港，呢個HKNFA Premier League其實同其他香港私人業餘七人足球聯賽性質一樣，有球證旁證場監，有焦點盃賽，例如「佐敦盃」，只不過大部分參與者都係喺香港出生嘅尼泊爾裔，而賽會希望HKNFA Premier League將來發展成十一人草地業餘足球聯賽，或者派隊參加香港足總旗下嘅低組別聯賽，但會唔會成事就唔知咯，不過香港足總旗下十多年前嘅丙甲聯賽有幾隊係有大量喺香港出生嘅尼裔球員，到現時香港足總旗下嘅甲、乙組別聯賽只有三位尼裔球員，而青年梯隊都有少量尼裔球員，但似乎陸續減少。