仲記得Arema(阿雷馬)兩年前來港踢亞協盃，有幾百位印尼球迷入場吶喊助威，「騎劫」了傑志主場，但數年前另一支印尼球隊 Persipura Jayapura (佩斯普拉)來港踢亞協盃卻只有極少印尼人入場支持，從此處可以睇到阿雷馬及佩斯普拉喺印尼嘅普及程度，同民族有密切關係。
阿雷馬雖然係爪哇東部瑪瑯市嘅球隊，但阿雷馬球迷卻遍佈成個爪哇島東部甚至成個爪哇島，因為大部分時間阿雷馬都起用生於爪哇島嘅球員，佢地多數係爪哇族，爪哇族係印尼主要民族，加上阿雷馬天生嘅感染力，去海外打工嘅工人大部分來自爪哇島中、西部，阿雷馬到訪如同印尼國家隊到來。
而佩斯普拉根據地位於印尼東端巴布亞省，球員主要來自巴布亞省及西巴布亞省，球員膚色同爪哇族完全唔同，更接近大洋洲各國土著，加上球員大部分信奉基督教，雖然巴布亞省都係印尼國土一部分，但膚色、文化、宗教唔同，與爪哇族都仲係有一種隔膜，來港打工者多為爪哇族人，自然對佩斯普拉冇乜興趣，甚至有種心態就係都唔係主要民族組成嘅球隊咁我睇黎做乜？
其實佩斯普拉嘅個案好值得講，球員主要係來自巴布亞省及西巴布亞省嘅巴布亞族，總人口比華人少得多，經常被欺壓，但兩省有多支職業球隊，佩斯普拉更係聯賽冠軍常客，從前巴布亞族常被社會無視，但佩斯普拉打出新天地，球壇被少數民族球隊稱霸，都令社會將焦點集中呢個民族身上，主流社會亦開始了解、接受巴布亞族。
講到印尼華人，人口比巴布亞族多，好耐之前印尼足壇上下都見華人蹤影，但現時冇一支以華人球員為主嘅職業球隊，華人極少參與官方足球活動，事關印尼華人派系多欠缺組織性，傳統觀依然認為踢足球係玩而唔係搵食，最重要華人怕參與足球後''被''成政治犧牲品，畢竟大部分華人只求一家平安有飯食平平穩。
圖片來源：bolaindo.com
圖片主角：Persipura Jayapura