憑住Sharifi Amrruddin(阿美路甸)嘅兩個入球，阿斯麥隼鳥以2比1擊敗邁萬德冠軍奪得今年阿富汗超級聯賽 ，繼2013及14年後第三次奪冠，呢個為期一個月多少少，全球最短嘅官方足球聯賽賽季就此完結。
聯賽完結後班球員就會各散東西，做返自己嘅正職及兼職踢其他地方業餘聯賽過活，然後少部分會入選國家隊，如果冇穿冇爛嘅都係咁等一年後聯賽重開，而社會極度不穩定係阿富汗聯賽無法踢循環制及職業化、正常化嘅原因，所以國家隊方面阿富汗足總會繼續向海外合資格球員伸手。
現時有超過三十名於海外出生嘅阿富汗血統球員已代表阿富汗出賽，大部分效力北歐、德國、荷蘭嘅低組別聯賽球隊，另一部分拎住阿富汗球員身分去到亞洲地方搵食，例如國家隊中場兼隊長Faysal Shayesteh(沙耶斯特)咁，佢雖然喺阿富汗喀布爾出生，但因為阿富汗戰亂而成家移民去荷蘭，後來成為荷蘭阿裔職業足球員，去過保加利亞搵食，由於自知無緣入選荷蘭國家隊，所以答應代表阿富汗出賽，亦因為亞援身分可以去亞洲搵食，現時效力馬超球隊彭亨FC。
即使呢批海歸兵效力嘅海外球會只係來自當地低組別聯賽，或者來自亞洲三線水平聯賽，但比效力緊阿富汗超級聯賽嘅球員優勝嘅就係呢批海歸兵大部分都係踢緊職業，就算只係踢馬超，都真係好過你阿超，想搞好阿超，唔係你有人就得，國家隊仲可以靠海歸，而阿超未來就好睇當地局勢如何。