今日阿媽無啦啦係櫃到揾番件屬於上個世紀既衫出黎比我。點解係上個世紀？因為呢件係我中二個陣時既校隊波衫。諗番起，原來都已經十年。(唉，dee, 唔小心爆左自己幾多歲) 當時既我仲係一個龍門，正確啲黎講，係一個米六都無既龍門，因為未發育嘛，發左育我高過曾志偉都仲得呀！個陣學校足球隊唔係常設，間唔中得閒先搞一次，好幸運我等左一年，終於有機會踢下校隊。
我仲好記得當年整波衫既事，首先就係要去唔同舖頭拎整波衫既單張，睇下有咩款揀。當年啲款邊有咁多，邊可以上網話睇就睇，要親身去拎佢既sample 黎睇，又邊似而家個啲波衫咁靚咁高質素？我地呢啲死靚仔又邊買得起幾舊水既nike, adidas, 又或者印靚字？ 而對我黎講，當年最興既運動品牌，係個陣時應該唔係nike, 而係super x。個個好似火箭炮圓筒型既運動袋，真係得罪講句，你一定有買過呢個袋，甚至係由小學用到上初中既一個體育堂必備運動袋！真係撞袋撞到好似而家同街都係iphone 咁。同7-11 一樣，總有一個super x 係左近！而順住潮流，個陣就揀左｢super x｣呢個牌子做我地既波衫。
其實我比我啲隊友好，佢地幾十個人都係著同一件衫，仲要係短袖。我就唔同呢，龍門得兩個人，可以自己揀顏色，總之唔好撞色就得。仲要件衫係長袖兼有個軟墊位，真係冬個陣都可以保下暖，仲要係車線號碼，唔係熨印，而最重要既係，價錢一樣呢下抵嘛！不過實際價錢係幾多我已經唔記得，應該都係百零蚊。
不過呢件波衫係踢完班際兼學界之後我就無再著了。點解？一黎我無再打龍門，轉左踢前鋒，二黎學校又再停辦足球隊，就算我仲做龍門都無機會著咁濟。不過有時屎忽癢，揾衫個陣見到件衫，都會拎出黎，笠上身試下。呀，又出奇地岩身喎，係個身短左啲！我都唔知係當年預左會有排著而買大幾個碼，定係我呢十年黎都無發育？唔會啦，我而家都有一七五(又唔覺意自爆), 我諗前者既機會會大啲。
今日天氣真係凍左好多，慈祥既阿媽有意無意咁揾左件衫比我，仲好有心咁同我講：｢你有件長袖衫喎，訓覺個陣可以著，唔好曬左佢！｣唔，聰明既你應該估到我阿媽口中個件長袖衫係邊件。個刻既我心情好忐忑，件衫係我初中時整，我特登留黎做紀念，你叫我訓覺著？但另一方面，雖然係長衫姐，但件衫有繡花，又有軟墊，要著住訓覺真係會un 住un 住喎！我中意足球啫，但又未去到呢個地步。個陣我都唔知好嬲定好笑好。只係講左句：｢阿媽，你係咪玩野？｣但係我得承認，我係窩心。唔單止係因為阿媽對我既關心，仲有佢咁可愛抵死啜核既思想，而且仲係呢件帶比左我咁多回憶既絕左版super x 波衫。
呢一刻，真係要講句：｢In super x, I trust…… in ten years ago… ｣