TVB 大灣區足球故仔引起討論，等我又加把嘴。
喺新聞界呃過幾年飯食，先來小罵大幫忙。駐外站記者經常要搵專題故仔填塞星期六日，較為少主流新聞嘅日子。駐廣州站記者揀隻關於足球嘅故仔，加上近期智將煮食提及過嘅，作為新聞資訊無可厚非。基於有人講好過冇人知嘅大原則，你話佢錯咩？又唔可以，但總有理由令人咬牙切齒，呢種感覺我會叫「無綫式噁心」。
令人噁心，係因為TVB 甘於「政治性選材」，而非基於公眾利益而選材。新聞同其他事一樣，都係關乎資源取捨，唔單止係睇你「有咩」，而亦要睇你「冇咩」。舉個例子，大灣區足球賽作為第一個跨地域業餘聯賽，係可以『有』、值得報道嘅，但同時間你睇，TVB 投放落本地足球嘅資源，『冇』嘅係咩？如果重視足球，《六點半新聞》體育環節點解消失？如果重視足球，《球迷世界》點解消失？如果重視足球，點解本地足球聯賽，或者香港隊作客嘅比賽，唔爭取多做直播？如果重視足球，點解解散體育組？
如果要以公眾利益作為新聞選材嘅標準（我覺得呢個係常識），同樣係駐廣州記者可以做嘅，R&F富力記者會會唔會做？香港隊早前去廣州集訓有冇做？徐宏傑係梅州嘅比賽，有冇做？如果要講公眾利益，同整體故事重要性，點都重要過一個第一年搞，仲要講明係『齊齊有波踢』為目標嘅業餘聯賽掛？如果呢個題材有凌駕性公眾利益，是否代表業餘比職業重要？比代表隊重要？香港本地都有大量業餘聯賽，係咪又要coverage 呢？點解呢個「大灣區足球聯賽」如此重要，值得駐廣州記者專程去做？
唯一合理嘅答案，都係因為「大灣區」。說實在，同類型嘅聯賽好多年前已經有，一直都有辦，以廣東多地嘅業餘球隊聯誼作賽，只係今年「響應號召」改以「大灣區」作名號，當然搵埋貝生參與就變成「粵港澳大灣區」啦。如果呢個聯賽唔係以「大灣區」為招徠，TVB 會唔會走去做？將新聞變成宣傳機器，呢個究竟係新聞判斷問題，還是新聞操守問題？
再講，既然係要做，就正正經經派體育記者做吧，至少開故仔角度會更好。既然係要講大灣區聯賽，點解唔係訪問已經開操嘅愉園，如何備戰大灣區聯賽？連自己香港嘅球隊都唔訪問，去做一隊業餘廣州隊？
搵個唔熟悉題材嘅港聞記者做，只能夠係罐頭行貨式拍一次操、做兩個Bite、兩張Graphics、加個爬尾。更為奇怪嘅係，連基本新聞都未做好，「珠海斗門」都變成「珠海鬥門」（鳴謝 足球文青 提供），地理問題搞掂先好冇？記者、採主、剪片、濕檯、導演全部都係睇唔到，雖說做過呢行都明錯字難免，但喂大佬，有任務就唔好咁是是但但啦好心。唔講咁遠，呢種陳年腐化嘅新聞模式，仲想是是但但多幾年？
最噁心嘅係，TVB 有無可爭議嘅普及度，所以愚民能力等同化武，是是但但求求其其，遺害香港。唔係想對個別記者編輯開炮，老實講圈子小小，前線記者編輯認識不少，絕大多數都是戰戰兢兢想做好新聞，只係管理層、採主、濕頭只係一心逢迎上大人，如果將拍馬屁嘅一半，甚至四份一心思真心支持本地體育、支持本地足球，功德無量矣。
補充段落：
結尾重申一點，呢隻故仔並非「不能做」，而係不應忽略其他本地足球消息。如果要一做到底，懇請TVB跟愉園作客肇慶，場場作客都outport。「大灣區足球賽」本為交友聯誼，無話反對，但重中之重係本地足球要自立自強，一定係做好自己聯賽、青訓，TVB呢種錯重點既報道，只會誤導普羅大眾，如梁孔德之流，誤以為北上業餘聯賽係香港足球既出路，呢點先係愚民毒藥！