2018俄羅斯世界盃，亞洲區外圍賽一早開打，香港隊都踼左兩場。但歐洲區外圍賽上星期六先抽分組。52隊分9組，爭13個位。
咪住！ 52隊？ 條數點黎？
歐洲足協(UEFA)有54個會員國，主辦國俄羅斯唔使踼外圍賽，即係54減1，應該係53隊。剩番邊隊？德國？德國冇錯係世界盃衛冕冠軍，但一樣要踼外圍賽。
邊隊搞到唔啱數？就係直布羅陀 (Gibraltar) 。
直布羅陀獨立左未？ 梗係未。但作為香港人，你都應該知道唔使獨立，都可以有足協會藉。正如台灣澳門一樣有。英國甚至因為歷史原因有四個會藉(英格蘭，蘇格蘭，威爾斯，北愛爾蘭)。
所以直布羅陀獨立左未，並唔係重點。事實上直布羅陀早幾個月都有踼緊2016歐洲國家盃外圍賽，早排先在電視睇過(主要係睇德國)。
怪雞在直布羅陀有歐洲足協會藉，但冇國際足協(FIFA)會藉。而歐洲國家盃係歐洲足協主辦，世界盃係國際足協主辦。所以歐洲國家盃外圍賽就有份，但世界盃外圍賽就冇份。以為歐洲足協會員就必然係國際足協會員？冇咁既事。
直布羅陀入歐洲足協呢壇野 1999年提出，但當然係西班牙勁反對。 原因你都估到，固然有足協會員地位不等於獨立 (參考香港澳門蘇格蘭等等例子)，而直布羅陀足球員亦冇乜人關心。但西班牙至驚開左呢個先例的話，巴斯克(Basque)同加泰隆尼亞(Catalonia)都會申請會藉。都未使講到國土分裂，諗下如果當年西班牙冇碧基(Piqué)，沙維(Xavi)，沙比阿朗素(Xabi Alonso)等球員，都幾大件事。
2007年再投過一次票，結果亦只得三個會員贊成直布羅陀入歐洲足協。估下邊三個？ 梗係 英格蘭 蘇格蘭 威爾斯。關於西班牙 英格蘭 同直布羅陀的恩仇情仇，就不在本文討論了。
當年只得呢三票支持直布羅陀，其中一個原因當然係西班牙威脅退出歐洲足協既賽事。唔止國家隊退出歐洲國家盃。西班牙球會仲會退出埋歐聯。冇皇馬既歐聯 (但可能有巴塞？)，好難想像。所以大家先理佢。如果係其他三四流國家就未必有呢種籌碼。
結果呢壇野之後，歐洲足協就「釋法」， 規定只有聯合國承認既主權國家 (即係，台灣冇份，但台灣唔在歐洲啦下) 先可以申請會藉。拒絕左直布羅陀。仲封埋巴斯克 加泰隆尼亞之類的後門。
直布羅陀足協不服， 去搵國際體育仲裁院 (Court of Arbitration for Sport) 上訴。 結果上訴成功。個理據係，直布羅陀一早申請會藉，遠在歐洲足協改例話「主權國家先可以申請」前。 2013年再開會，就只得西班牙同白俄羅斯反對。於是乎直布羅陀就成為歐洲足協會員， 但巴斯克同加泰隆尼亞之後想申請就有點難度了。
至於國際足協方面，直布羅陀一樣有申請，但2014年被國際足協拒絕。同歐洲足協的理由一樣，白禮達(Sepp Blatter)話因為直布羅陀唔係獨立國家。但留意，國際足協現今亦有22個會員唔係獨立國，在歐洲區亦有5個 (主權屬丹麥的法羅群島Faroe Islands，以及之前提到的英格蘭，蘇格蘭，威爾斯，北愛爾蘭)。
同樣地，直布羅陀足協一樣搵去搵國際體育仲裁院 (Court of Arbitration for Sport)上訴，今年5月先開始審，當然趕唔切上星期己抽簽的2018世界盃外圍賽。
順帶一提，本人原本都有諗過去直布羅陀主場，睇直布羅陀對德國的歐洲國家盃2016外圍賽(今年6月踼左)。最後打消念頭，因為直布羅陀的「主場」Victoria Stadium太細，未符合歐洲足協要求，所以直布羅陀的「主場」賽事全部在葡萄牙踼，咁就唔好玩啦。但唔使絶望，直布羅陀起緊個符合要求的新主場Europa Point Stadium，預計下年就搞掂。不過，點都會係2016歐洲國家盃之後的事了。