上得YouTube，我無非係想睇下足球精華片段，例如重溫下伊巴點樣一個扭幾個扭入龍，例如重溫下11-12賽季車路士點樣一路過關斬將殺入歐聯決賽最後奪冠，得閒嘅，我都會留意有冇人upload新片上YouTube，例如笑住睇「Bomba」別出心裁地賣廣告等等，話說近日喺YouTube見到有條片叫「月入三萬的香港人，於是click入去睇，坦白講，家家有本難念的經，如果月入三萬蚊嘅成功人士都有咁嘅悲歌，咁我諗我呢D月入一萬既廢青都有大把故事想講。
我叫Hugoson，人地都叫我亞臣，自從小學三年班發夢想做球星開始，我就幫自己改咗呢個名，我希望自己做呢個世界嘅唯一，可惜一路走來，十幾年青春付諸流水，我都係冇成為一個球星，唯一不變的是，我仲係咁鐘意踢波、睇波同寫下足球文章。
由細到大，我都係介乎窮與僅僅溫飽之間既狀態，從來都冇有錢過，望住其他細路哥食住麥當奴玩緊Gameboy個陣，我都係得個望字，喊住祈求阿爺幫我買一個開心樂園餐，結果換黎一餐「藤條炆豬肉」，到宜家23歲，一樣好多野係可望不可及，莫講話樓同車，連女朋友呢三個字，我都開始質疑只係屬於字典入面既詞彙，唔會屬於我。好彩，我仲有足球呢個「好伴侶」，返工最開心莫過於返屋企睇場波，放假莫過於就係落街場踢場波，早於職場上習慣假笑的我，喺足球面前，我係真誠地笑了。
小夥子，長大了，好多野要兼顧，頭號問題就係家用。雙親家庭永遠唔會明白單親家庭有幾咁辛苦，單親家庭亦永遠唔會明白屋企人有病係一件幾大問題，我經歷過單親家庭，到老母翻嫁，我終於有一個錫我嘅老豆，可惜好景不長，老豆爛賭搞到爭人好多錢，老母就沉迷飲酒日日飲醉，婆婆係一個精神病病人，一日到黑喺到鬧人，喺呢種情況之下，我選擇唔讀書出黎做野，以為做sales搵到錢喇，點知公司要我去呃阿婆呃阿叔，我唔呃人，所以跑唔到數，我靠自己方法去搵客，一開始都叫穩定，後黎公司加target，又拖欠我薪金，我一怒之下就辭職，點知，辭職之後我先知，我唔做sales，根本冇乜工係適合我，學歷低，又唔識英文，可以做d乜？
人總係固執，當佢認定一件事情係值得去做，就會義無反顧去做。正如我俾家用，月入兩萬就俾一萬五，月入一萬就俾八千，好多人話我係傻仔，但寧願我相信「孝感動天」，有一日買場波膽3x1中幾百萬，都唔會俾少家用。因為我覺得俾錢可以令屋企少d紛爭，老豆老母可以和睦相處，細妹可以快高長大，婆婆可以生生性性，結果係事與願違，老豆繼續賭錢落海然後搬走埋，老母繼續背住我返工飲醉，婆婆繼續漫無目的地鬧人……曾經我都試過，想死，一了百了。
放工後回家，望住衣架上個件泛黃嘅列斯聯波衫，我當時真係感觸到喊出黎，以前點窮點俾人遺棄點俾人睇唔起，我做人都係充滿激情，只要個波喺我腳下，我就要爭取入波，而晚上返到屋企就會打開電視支持列斯聯，有英超就睇英超，冇英超就睇足球新聞，見到列斯聯隊波我就會好開心，以前好易滿足，每一日都過得好充實，何解十幾年後，我灰到想死？我唔可以死啊，死咗咪見唔到列斯聯升上英超，冷靜過後，我就著起件列斯聯波衫，落去球場踢波，因為只要踢波，我就唔會胡思亂想，就唔會喊，雖然我知道我踢完波之後都係會喊，至少喺球場上個兩粒鐘，我係堅強而又努力，好似列斯聯咁熱血。
從18歲到23歲，5年時間，我明白到帶住負能量做人係更加辛苦。我放棄做sales做埋沒良心嘅工作，取而代之就係勞力工作，做過廚房，做過waiter，做過地盤，做過倉務，最後選擇做冷氣安裝師傅。
每個月得個皮幾野，俾家用已經比咗7成，再交埋D上網費手機費等等雜費，人工已經得返3000幾，衰d講句，搭車都用咗1000幾，得返2000銀，要解決食飯問題，仲有去踢波要俾場費同買水，以前我真係覺得好灰，但直到我見到車仔拎到歐聯冠軍，我漸漸個人都變得開朗，我明白到呢個世界堅持到最後或者會有幸福，與其怨天尤人，不如欣然接受生活中挑戰，人地成日都話人在磨難中成長，呢句說話真係冇錯，尤其係踏入社會後，社會就好似一本百科全書，教曉每一個新丁每一樣知識，有人問我點解咁鐘意做冷氣師父，我忽然好似智者上身咁同佢大講哲理：
「好多樓我都買唔起咖喇，難得有得參觀，咪當下滿足自己虛榮心，成世人都無法擁有但能夠曾經踏足過，都叫做了卻心願，哦原來呢度樓宇結構係咁咖，咦乜呢度係複式單位，咪得個知字，以後提起呢棟樓，君臨乜乜，名乜名乜，我會話呢度冷氣都係我安裝咖；平時都識唔到女仔，靚女見到我都未必會正眼望我，但去人地屋企安裝冷氣，如果撞到後生女，有時候佢會請我飲可樂，會對住我笑，會同我講野，咁未試過食豬肉都叫見過下豬仔走路，都算唔錯啊；仲有，返九收六，放工可以考慮去踢波，或者返歸睇波，一份工作，滿足咗我三個願望，直頭神奇過Kinder出奇蛋喇。」
月入一萬，好多野都做唔到，平時要逼地鐵逼巴士返工，早餐要挨方包加水，見到心儀嘅波衫想出手但驚又生活費挨唔到月尾於是被逼放棄收購，想睇波一定係睇sopcast，好多想睇嘅場次都冇得睇，但唔捨得俾錢裝有線睇德甲，想去艾蘭路球場睇列斯聯比賽簡直係發夢，但，我冇因此頹廢，每日都係堅強做人，個件泛黃嘅列斯聯波衫一早因為搬屋而整唔見咗，但我發覺我已經唔需要個件波衫去支撐我，因為列斯聯一直喺我心目中霸佔住一個重要嘅位置，雖然我已經變成車路士球迷，但我唔會忘記當年列斯聯帶給我嘅快樂同鼓勵，係啊，唔知幾時等到列斯聯升上英超呢？唔理等幾耐，我都一直會等！
鐘意一個女仔，就唔好理有冇緣分，追咗先，追唔追到係後話；鐘意一樣興趣，就唔好理有冇天份，做咗先，成唔成功係後話，趁後生就要做自己鐘意嘅事情，就好似我踢波咁，我唔見得好好波，但我樂此不疲，又例如我鐘意寫文，唔見得我打呢段野會有好多人睇，但每一字每一句都係我好想表達嘅野，忘記得失做咗先，唔好俾自己留下遺憾。
如果俾阿倫史密夫多一次機會，佢會唔會伸腳去擋懷斯個球波而搞到自己重傷落場？我相信阿倫史密夫一定會伸腳去擋，因為呢個就係阿倫史密夫，呢份熱血，就係足球場上最美妙嘅野。
做人，最緊要有個份熱血同衝勁，月入一萬對於我黎講，少係少D，但我好滿足！因為我有足球陪伴我。
如果有一日終於俾我挨到月入三萬，咁我每個月都會買幾件車路士/列斯聯波衫，一得閒就飛去史坦福橋球場/艾蘭路球場睇波。
圖來源：網上圖片
多謝支持Facebook page 筆下留情·足球說歷史