今週印錦賽A區有一場觸目大戰，就係斯里維加亞主場對阿雷馬，結果吸引超過二萬名球迷購票入場。印尼足球雖然處於低潮時期，但唔代表連球迷都趕走埋，只不過部分球迷並非堅持每一場都入場之一類，只會挑選戲碼較重嘅賽事而入場，斯里維加亞可以話一個好例子，今年斯里維加亞喺印錦賽A區嘅主場賽事平均入場人數唔算多，大約係7000-15000，相比幾年前基夫屈機年代平均二萬差得遠。但唔代表球迷遠離球場，就好似今日主場對阿雷馬，突然比平時多咗成萬幾人入場，呢批球迷可能都有留意斯里維加亞動態，只不過冇死忠咁誠心。
有部分死忠係好討厭呢批選擇性浮上水面嘅球迷，覺得呢批選擇性球迷只係食氣氛而入場，根本唔係真心支持球隊。但無可否認，呢批選擇性入場嘅球迷會令場面更火爆，球隊應該諗計去點樣留住呢班可能下場唔見人嘅球迷，最少呢批選擇性入場嘅球迷願意離開電視機前走入球場已經難得。
某些海外球迷經常形容印尼足球球市好火爆，每場波都座無虛席，但講出呢類說話嘅海外球迷明顯只係睇到某些火爆畫面就以偏慨全，某些印尼球隊即使有地方吸引力但只要成積一跌球迷就會流失，依然為吸客而煩惱，一場可以坐四萬人嘅波最後只有八千幾人入場，可能睇慣港超感覺唔錯，但睇返斯里維加亞嘅個案，已經係失敗，斯里維加亞有巨港市呢個市場，絕對有力增加平均上座率，但只會批評球迷選擇性入場係無助球市。