有啲球員喺數據上，可能係碌碌無為；但唔代表整體上，佢就一無事處。
好似法國基奧特，雖然佢今屆踢咁多場都食白果，人人都笑佢冇腳好波，但又有幾多人留意到佢喺法國戰術嘅重要？無論係停波、二傳、拉直、走位定做支點，佢樣樣都做得出色，唔係佢喺前面做牽引，身後同兩旁嘅基沙文、丹比利或者麥巴比根本冇咁多空位突破。
係，佢真係入唔到波，但法國每場都關佢事，分組賽第一場靠佢回傳畀普巴射門破網、第二場係佢嘅射門令麥巴比執雞、對阿根廷做二傳再畀麥巴比破門、尋晚對比利時贏嗰個角球，正正就係基奧特搏返嚟！
作為前鋒，佢唔介意由最前走到返最後幫手防守；
作為前鋒，佢唔介意做球隊綠葉幫後輩頂波開路；
作為前鋒，佢唔介意畀人恥笑佢冇入波，
因為佢知道自己可以點樣幫到球隊。
「我需要為隊友、為球隊而戰，我在場上的角色，就是為隊友製造空位和機會，讓他們得分。」
又好似英格蘭嘅史達寧，人人都因為佢浪費機會而問候佢老母，叫佢「躝啦唔好阻住地球轉」，甚至人生攻擊話佢跑姿係死乸型，但其實又有幾多人知佢嘅無球跑動、個人突破、走位配合、拉邊插前、竄擾對方後衛嘅能力，對英格蘭有好大幫助，甚至係現時英格蘭冇乜邊個做得出色嘅事？上場佢後場接應長傳破單刀嗰下入攝真係走得好靚，但最後人人都只係留意到「唔入」呢個結果。
你可能會話，前鋒唔入波有咩用？球員嘅作用從來唔止係咁單一，最起碼球員要知道自己有咩能力、點樣為球隊付出。係咪因為佢着10號，就一定要做印象中派牌嘅發電機角色？前英格蘭前鋒高治講過一句：「純粹以入球數字以及單刀失機去否定球員的貢獻是不公平。」
從來唔係話要用其他事嚟遮蓋本身嘅不足或缺點，Finishing差係事實，呢點係一定要改善，唔可以次次隻字不提，只係想問一句，係咪每次都要用入波角度嚟評定功過呢？