香港球迷對打氣團既存在好兩極化、好矛盾。
一方面，香港既球迷認為打氣團揮旗、企係度吶喊係阻住你睇波，因為你地覺得買左個幾十蚊既飛入左場睇波，你就可以話哂事。但係香港球迷又真係好希望有人打氣，因為佢地都知道一場波冇打氣團，就會難以投入比賽。
歸根咎底，係因為香港球迷並唔識得尊重－－打氣文化。
外國舉行既賽事，多數係由打氣團帶領一眾既球迷去唱歌、嗌口號，但係呢啲係外國見慣見熟既場面，係香港就好少見。因為大部份既香港本地波球迷從來唔參與打氣，佢地真係以為入場睇波，就真係只係「睇」場波。
打氣文化，唔係必定會存在係球場，如果冇新血加入，打氣團一樣會意興闌珊，甚至會解散。
舉個例子：
其實球場既打氣文化，就同香港既本土意識一樣。今日你唔幫手發聲，去爭取、去維護，到聽日你想搵人發聲既時候已經太遲，因為已經再冇人可以幫到你。
有啲野，你唔去做、唔去試、唔去爭取、唔去參與既話，慢慢，慢慢，你就會發覺佢消失左架啦。
我明白香港球迷係好怕醜、好慢熱，但係大家都唔好忘記，打氣團既球迷都同大家一樣，只係佢地可以踏出佢地自己既框框，敢企出嚟。
大家如果唔想香港足球既打氣團一個一個咁縮水、消失，下次睇波既時候，不妨同打氣團既人講句：「不如一齊打氣呀！」
我相信，佢地係絕對唔會拒絕你既。只要你肯企出嚟，你就係球隊既第十二人。
一種文化、一種精神、一種關係，有時候就係咁樣建立出嚟。
圖：Facebook、HKFA