當你聽到「奧燒退出國家隊」，你可能第一時間會諗：「佢咁嘅表現應該要讓位啦」，但從奧燒聲明中發現，佢退隊原因根本同表現無關，而係因為歧視問題。
話說世界盃之前，擁有土耳其血統嘅奧燒，同土耳其獨裁總統埃爾多安見面兼合照，結果引嚟德國傳媒極大迴響，德國足總都冷待事件唔撐佢，更被一班德國右翼份子兼政客借作政治宣傳，甚至世界盃出局後以奧燒做箭靶，不斷窮追猛打，因為奧燒係「非德裔」代表人物，攻擊佢絕對有助增加選票。
你可以話點解佢係公眾人物都唔避嫌？奧燒喺聲明中解釋係基於尊重：「對我來說，與埃爾多安總統合照並不關於政治或選舉，而是我對我家鄉最高職位的人的一份尊重。」事實，奧燒早喺2010年與埃爾多安見面，當時總理默克爾亦同場，咁點解當初唔高呼奧燒躝啦？係咪因為近年嘅難民問題、甚至埃爾多安同德國之間嘅惡化關係而成為代罪羔羊？
聲明中，奧燒有一句極度灰心說話：「當我們獲勝時，我是德國人；當我們輸波時，我就是個移民…」
你話佢場上表現差而退隊係情理之內，但已經有數據證明奧燒絕對唔係最差嗰個，而家竟因為佢「非德裔」身份而窮追猛打，早幾年奧燒當打又唔見你講？4年前奧燒幫德國贏世界盃你唔講？你而家當人condom用完即棄？更何況奧燒係第三代移民，生於德國、接受德國教育、講德文、為國家付出，已經係徹底歸化，但偏偏而家拎返佢「土耳其身份」嚟講、甚至要佢一個人孭晒德國出局嘅鑊。你話佢垃圾最多係唔尊重佢，但你攻擊佢血統身份就係歧視！
「我只是一名足球員，並不是政治家…」
9年來，92場出場，87次正選，23個入球，28次助攻；5次德國足球先生，德國核心兼助攻王，但最後淪為政客嘅政治工具，灰心離場，難怪佢阿爸都撐佢退隊好過。
作為支持奧燒嘅球迷，望到佢咁樣離開國家隊真係好心噏。你可以話佢太天真、冇政治意識，但佢唔係冇解釋過原因所在，可惜唔會有人聽，要入你罪就入你罪。如今因為一張相就完全推翻佢為德國嘅所有付出，以足球層面上，佢真係唔應該落得如此下場…