成日講亞洲波，都好悶吓，係時候講吓啲歐洲波喇。
中亞國家哈薩克喺歐洲國家盃外圍賽A組暫時排緊包尾，目前已經冇任何出線希望，雖然仲有兩輪賽事未完成，哈薩克仲有機會唔洗包尾，但黎緊其中一支對手係爭緊第三名嘅荷蘭，最尾至會作客對實力最接近嘅拉脫維亞，即係包尾機會都幾大，呢個結果相信好多球迷都一早估到，始終哈薩克足球水平同小組對手如土耳其、捷克、冰島等都有一段距離，能夠半場領先荷蘭兼唔洗全程挨打，球迷都肯收貨。
我就唔識波嘅，我好鬼無聊咁睇咗哈薩克喺外圍賽個八場波及今年所有友賽，雖然都係輸波收場多，但我就認為今次哈薩克喺歐洲國家盃外圍賽之旅又有進步，即使只係稍微嘅改善，但相比昔日競爭對手，同屬中亞國家嘅烏玆別克，哈薩克足球嘅進步就更明顯，只不過身處賽區水平差別太大，哈薩克於歐洲足壇輸多贏少，雙方排名有距離至會令球迷產生一種錯覺，以為哈薩克入歐後足球走下坡。
歐洲足壇同亞洲足壇至今都仲係兩個世界，今日烏玆別克足球喺亞洲算係一支有實力嘅隊伍，而哈薩克仍然被認為係歐洲其中一支魚腩部隊，但烏玆別克長期面對嘅係巴林、朝鮮、菲律賓、香港等對手，而哈薩克長期面對嘅則係捷克、塞爾維亞、英格蘭、德國呢類世界級對手，即使係對住同屬歐洲魚腩嘅馬耳他，要贏波都唔係咁易。
喺呢個競爭環境底下長期磨練，哈薩克足球己經與脫亞前相差甚遠，1994年哈薩克足協因為地理問題而加入亞洲足協，即使當時哈薩克隊喺亞洲足壇內都算係一支有實力嘅隊伍，但哈薩克足協都仲係希望有機會就應該脫離亞洲足協向歐洲足協敲門，原因有兩個，其中一個就係足球環境因素。
哈薩克足協加入亞洲足協後，發覺亞洲足協管理模式以及亞洲足球水平都好落後，另外哈薩克足協認為由中東力量主導嘅亞洲足協處事不公及有偏幫某些成員國之嫌，此等運作方法嚴重影響亞洲足球運作，儘管留喺亞洲打入世界盃決賽週嘅機會唔細，但於一個欠缺健康嘅足球環境之下活存，哈薩克足球末來難有希望，所以哈薩克足協一直希望哈薩克可以以一小部分國土於歐洲地帶為由加入歐洲足協，加入歐洲後肯定更難打入世界盃決賽週，但哈薩克足協首要目標係尋找一個環境較優勝嘅平台，世界盃決賽週己成次要夢，反正長留亞洲亦末必能夠打入世界盃決賽週。
另外一個脫亞原因就係同錢有關，由於歐洲足球主導世界，哈薩克加入歐洲足協後，外圍賽令哈薩克足協豬籠入水，同時又有更多資金去搞足運，對住英格蘭、德國等級數嘅對手，唔洗講哈薩克輸少幾球擋贏，但呢啲能夠吸引全世界球迷目光嘅對手，喺亞洲係搵唔到嘅。
未脫亞入歐前，哈薩克足協內部有少量反對聲音，認為哈薩克加入歐洲足協只會淪為長期魚腩，哈薩克足球並唔會得到進步，只會成為笑炳，而支持嘅聲音則認為加入歐洲足協係哈薩克足球最佳出路，但需要一段時間至可以喺歐洲足壇搵到一個站得穩嘅位置，而時間可以係二十年、三十年、五十年，甚至一百年。
哈薩克足協脫亞入歐至今十三年，國家隊於歐洲賽區依然係包尾大熱，但呢支位處中亞嘅歐洲隊伍，一年比一年成熟，最少，今日佢地有能力守和俄羅斯，作客荷蘭都唔係一無是處，而艾斯坦拿(FC Astana)更成為有史以來第一次殺入歐聯分組賽嘅哈超聯球會，另外哈薩克球員最新外流目的地在唔係前蘇聯國家，而係意大利、德國。
但係哈薩克足球離真正成功一日，睇黎仲係好遠，究竟幾時一提起哈薩克呢三個字，大家唔會即刻諗起波叔、排球妹莎賓娜，而係足球呢？
參考：