友誼賽哈薩克 7-1吉爾吉斯 ，哈薩克贏得輕鬆自如。吉爾吉斯以亞洲挑戰盃之大約陣容迎戰哈薩克，哈薩克就以一半新球員加一半老球員為主，雖然哈薩克足球喺歐洲只係一支弱隊，但回到中亞，哈薩克可算是大佬。
睇咗超過10場哈薩克國家足球隊嘅比賽，我認為，今日嘅哈薩克足球，比昔日中亞大佬烏茲別克足球走得更遠。哈薩克加入歐洲後輸多贏少，唔少球迷不解哈薩克足球點解寧做歐洲弱旅而不做亞洲勁旅？以哈薩克足球之實力，未脫亞之時亦算亞洲足球勁旅，如留喺亞洲，打入世界盃嘅機會會比加入歐洲要大。
其實，哈薩克足球加入歐洲，有好多益處，錢揾多咗，對手實力高咗，足球環境好咗。至於歐洲盃、世界盃，距離哈薩克好遠，哈薩克首要目標，係同匈牙利、羅馬尼亞之流平起平坐。呢個係長遠計劃，哈薩克要喺短時期內成為歐洲2-3流球隊，要喺短時期內打入歐洲盃、世界盃，機會唔大，但以後嘅事邊個知？