中亞國家吉爾吉斯為加強國家足球隊實力，近年協助幾位喺吉爾吉斯踢波嘅外籍球員轉籍吉爾吉斯，呢幾名外籍球員來自加納、喀麥隆及巴西，但於2014年亞洲挑戰盃中，吉爾吉斯依然要喺分組賽出局。有入籍球員之下嘅吉爾吉斯國家足球隊，實力係有所提升，友誼賽對住歐洲三、四流國家足球隊踢得有板有眼，不過去到正式賽事，作客對住馬爾代夫都係輸波收場。
但係吉爾吉斯足總依然積極向喺吉爾吉斯踢波嘅合資格入籍外援球員打主意，希望呢班外援球員入籍後改善吉爾吉斯國際賽成積，雖然上年吉爾吉斯失利於亞洲挑戰盃，但加入入籍球員後，進步係明顯的，呢類入籍政策世界各地都有，雖然長遠並非良藥，但可用作暫時止痛之用，喺止痛期間就要盡找尋正確根治方法，這就是入籍政策之用法。
吉爾吉斯係有唔少當打嘅本土球員，只可惜本土球員質素參差，令吉爾吉斯足球實力長期處於亞洲下游位置，與中亞各國實力都曾經愈拉愈遠。起用得入籍球員，就即係代表本土球員實力唔掂至要行呢步，如果吉爾吉斯國家足球隊用全吉班打亞洲挑戰盃預賽，出線嘅好可能係塔吉克而唔係吉爾吉斯。
但係咁，吉爾吉斯都有高質本土球員，例如效力俄超安治隊嘅邊後衛Valerii Kichin(基軒)，現時被租借到俄乙FC Tyumen(FC秋明)，呢位年青球員代表吉爾吉斯出征亞洲挑戰盃，於賽事中盡顯與隊友不同之級數，用表現去告訴球迷：我係夠資格喺俄羅斯搵食。
如果吉爾吉斯國家足球隊內每一位本土球員都有基軒嘅級數，又洗乜搵外援球員搞入籍？手續又麻煩，又唔係幫到太多，仲要分分鐘入籍完拎個亞援身分出去搵食唔肯返黎...