早幾日打嘅世界盃外圍賽亞洲區賽事，香港隊作客迫和中國隊，香港球迷、關注者條氣順晒之外，香港隊仲有嘢樣好威威，就係當日喺一眾作客球隊中能夠不敗嘅其中兩隊之一，另外一隊就係中亞國家吉爾吉斯，佢地又係以0比0守和對手約旦，一支可能比中國隊更惡打嘅中東黑馬。
早前都寫過一篇有關吉爾吉斯足球嘅垃圾文章，當中我提到吉爾吉斯足協為加強國家足球隊實力，近年協助幾位喺吉爾吉斯踢波嘅外籍球員轉籍做吉爾吉斯公民並入選國家隊，呢幾名外籍球員來自加納、喀麥隆及巴西，但呢幾位歸化球員能力一般，國家隊實力難有進一步提升，2014年拉隊去歐洲集訓雖然與愛沙尼亞友賽握手言和，但作客印尼卻被大炒收場，儘管之後作客賽和科威特，但對方只派B隊，到咗2014年亞洲挑戰盃，小組賽中吉爾吉斯被馬爾代夫淘汰出局，一年後在與同屬中亞國家嘅哈薩克友賽，雖然哈薩克以新人為主，但都可以大炒吉爾吉斯7比1。
歸化球員嘅加入，同吉爾吉斯本土球員唔夠班有關，唔係個個好似效力緊俄甲FC Tyumen(FC秋明)嘅Valery Kichin(基軒)咁，有咁好嘅資質，如果吉爾吉斯國家足球隊內每一位本土球員都有基軒嘅級數，又洗乜搵外援球員搞入籍？
由於呢幾個歸化球員幫助有限，吉爾吉斯足協改變策略尋找於海外居住並合資格代表吉爾吉斯嘅球員，結果就成功叫得郁本居德國嘅後衛Viktor Maier(域陀馬亞)、中場Sergej Evljuskin(艾夫祖斯堅)、Edgar Bernhardt(賓赫特)及前鋒Vitalij Lux(路斯)返黎認祖歸宗，當中以賓赫特名氣最高。
呢批海外兵團，相信吉爾吉斯國內大多球迷本身都唔知佢地係乜水，但先作客羸孟加拉，在於主場僅負精英盡出嘅澳洲，早幾日喺作客又守和約旦，佢地嘅加入確係對國家隊有唔少幫助。
而本土個班球員都多咗外流機會，雖然只係去塞爾維亞、塔吉克、哈薩克、甚至馬爾代夫，但有得出去睇吓個世界，都係件好事，睇黎吉爾吉斯國家足球隊會繼續行入籍歸化及海歸(海外回來歸宗)呢條路，幾時至可以好似哈薩克、烏玆別克咁用土砲都夠做呢？相信要一段時間。