話咁快AFC CUP（亞協盃）又到埋尾時候，雖然我取笑AFC CUP做WFC CUP（Who Fuckin' Cares Cup），即係「邊撚個得閒理盃」，而亞協盃的確冇亞冠盃咁高關注度，好多比賽都係幾千甚至幾百人入場，但事實上有少部分賽事都可以吸引兩萬以上球迷入場，雖然對某些參加亞冠盃嘅球隊嚟講有兩萬以上球迷入場係好平常，但對於水平同競爭力低得多嘅亞協盃嚟講，一場賽事可以吸引兩萬以上球迷入場已經好難得，睇睇亞協盃舉行以嚟嘅「十大最多人入場亞協盃賽事」有邊一場先啦。
01. 6 November 2010 Al-Qadsia卡迪斯亞 （科威特） 1 – 1 （a.e.t.） Al-Ittihad阿勒頗伊蒂哈德（敘利亞） （58,604）
02. 22 October 2013 East Bengal東賓高（印度） 0–3 Al-Kuwait科威特競技 （科威特） （50,000）
03. 19 October 2010 Al-Ittihad阿勒頗伊蒂哈德（敘利亞） 2 – 0 Muangthong United蒙通聯（泰國）（48,000）
04. 21 October 2009 South China南華（香港） 0 – 1 Al-Kuwait科威特競技 （科威特） （37,459）
05. 15 September 2010 Al-Ittihad阿勒頗伊蒂哈德（敘利亞） 3 – 2 Kazma卡茲瑪 （科威特） （34,400）
06. 17 September 2013 East Bengal東賓高（印度） 1–0 Semen Padang巴東（印尼） （30,000）
07. 3 November 2012 Arbil艾比爾（伊拉克） 0–4 Al-Kuwait科威特競技 （科威特） （30,000）
08. 15 September 2009 Al-Karamah卡拉馬（敘利亞） 0 – 0 Al-Arabi阿拉比 （科威特） （30,000）
09. 11 March 2014 Arema Indonesia 阿雷馬（印尼） 1–3 Hà Nội T&T河內T&T（越南） （29,130）
10. 14 September 2010 卡拉馬（敘利亞） 1 – 0 Muangthong United蒙通聯（泰國） （29,000）
最多球迷入場嘅係2010年亞協盃總決賽，由Al-Qadsia/卡迪斯亞（科威特）主場對Al-Ittihad/阿勒頗伊蒂哈德（敘利亞），雖然平時見Al-Kuwait（科威特競技）踢主場都冇乜球迷，而卡迪斯亞踢一般賽事入場人數都唔係好幾多，但去到決賽一場過就唔同講法，好多生客都會買飛入場，因為決賽呀嘛！所以咪有58,604人入場囉，同分組賽平均3,000人入場差得遠咯！而2013年亞協盃四強East Bengal/東賓高（印度）主場對科威特競技吸引50,000人入場，都係因為踢到入四強嘅關係，一般分組賽邊有力量吸到咁多人哇，南華對科威特競技都係因為殺入四強嘅關係至可以塞爆大球場咁滯（仲有神式宣傳見神蹟），所以好多國家嘅球迷都係選擇性入場，唯一分組賽都可以吸引接近30,000人入場嘅，就只有印尼嘅阿雷馬可以做到，2014年冇再分拆兩隊嘅阿雷馬再次參加亞協盃，由於分裂結束，加上大力宣傳及本身有吹雞力，成為有史以來亞協盃分組賽最多人入場嘅球隊，三場波平均有25,919入場。
當然啦，印尼阿雷馬嘅情况比較特別，阿雷馬球迷對球隊嘅投入好可能係參加亞協盃嘅國家入面最高，好多人唔會理分組賽定決賽只要捧開嘅球隊有比賽許可的話都會入場，不過當地有球迷依然覺得第一場對河內T&T唔夠35,000人入場算係比較少人入場，可能大家覺得一場分組賽事可以吸引接近30,000人入場係非常多（仲要踢日波），但對於人哋嚟講可能超過35,000人入場甚至40,000人入場至係合格，正如佢哋睇香港球隊分組賽平均入場數都係2,000到可能覺得少得可憐，同佢哋聯賽入面嘅山卡啦球隊主場一樣咁冷清，但喺香港足球嘅角度睇，分組賽平均入場數都係2,000已經算唔錯，有3,000直投哭謝天地啦，所以南華場波可以打入「史上十大最多人入場亞協盃賽事」第四位，已經唔錯喇。
而「史上十大最多人入場亞協盃賽事」入面，有兩場比賽都係由Al-Ittihad（敘利亞）球隊阿勒頗伊蒂哈德創造，其實足球喺敘利亞好受歡迎，包括呢隊阿勒頗球隊，喺當地有唔少死忠球迷，敘利亞參加亞協盃起都係西區最多球迷入場睇波嘅國家，不過現時敘利亞內戰未停，ISIS又打到埋嚟，阿勒頗已經畀戰火嚴重摧殘，仲踢咩波哇，好多阿勒頗伊蒂哈德球迷一係走佬，一係參軍，一係被炸死壓死，現時敘利亞聯賽雖然仲勉強搞緊，亦有派隊參加亞協盃，但要踢中立場，而好多球員因為打仗都冇踢波甚至死咗，有少量選擇外流，好似2010年四強阿勒頗伊蒂哈德主場對蒙通聯有48,000人瘋湧入場嘅畫面唔知幾時至見得返咯，呢場波踢完唔夠半年敘利亞就內戰。