1.有啲嘢真係嚟得好突然。
2.明明今周先睇到保方講，唔知二月嗰陣曼聯換帥未；點知幾個鐘後，曼聯就宣布炒咗摩連奴…
3.其實真係炒遲咗。老實講，以前都仲會講摩佬用人得宜或者大膽用人，但而家佢嘅調動同用人真係不敢恭維。雪普巴你都仲可以話佢態度有問題，但我真係諗唔明成隊波最有活力同創造力嘅馬達，點解都要場場波坐冷板？成條中場線都睇唔出邊個可以擔大旗。
4. 有名宿形容過摩連奴嘅用人（我都唔係好記得邊個講），佢話：「你有馬達、馬迪爾呢啲進攻好牌，但你偏偏將佢哋嘅優點放喺防守上面，成場波見佢哋防守多過進攻。大佬，我要睇佢進攻，唔係睇佢防守呀。」一段說話，道出曼聯戰術核心問題，你話敢講唔關摩連奴事？但又好老實咁講，佢算係接手費sir之後，最好嘅嗰一個…
5. 以前（十年前仲教梗車仔嗰陣）我係欣賞摩連奴，嗰陣嘅佢係有種傲氣，贏得嚟好寸，但佢寸得起呀。但而家嘅摩連奴十足十啲廢＿，冇成績又要寸，搵唔到嘢寸啦就瘋狂用歷史為自己護航。人人都掩住咀笑嘅時候，佢仲要理直氣壯咁respectx3，唔肯接受現實。（可能佢冇諗到3隻手指都可以係指佢過唔到第三季）
6.成功嘅人係唔會回望，只有輸唔起嘅人先會，仲要不斷提住。
7.以前嘅寸，而家寸唔起；以前用得最叻嘅防反，而家打唔起；就連佢以前最穩就係防守嘅賣點，而家都逐點崩潰逐點粉碎，摩連奴成個人，就好似完全過晒時咁…
8. 呢17年入面教過7支球隊，但每一次都係過唔到第三季，今次都唔例外。我諗除咗曼迷之外，其餘英超19隊球迷都會一致表示：「please stay jose」。