「呢個印尼嘅黑人歸化足球員……」
呢個，唔係黑人歸化足球員，係印尼巴布亞土著球員，佢叫蘇洛沙。巴布亞土著及非洲黑人真係好難分咩？？？？如果離遠睇，巴布亞土砲足球員又真係有啲似黑人歸化足球員嘅，又難怪，大家又係黑黑地，就好似我離遠睇陳肇麒又真係有啲似蒙古國家足球隊隊長Bayasgalangiin Garidmagnai（哥域馬尼），起初我以為肇麒有個兄弟喺蒙古，大家又係咁高大，大家又係型男，大家又係黃皮膚，又難怪嘅。
雖然巴布亞鳥頭半島（多貝拉伊半島）早已經比印尼吞噬成為印尼一部分，但巴布亞土著嘅生活文化同印尼主要民族爪哇族唔一樣，信仰唔一樣，加上貧富不均，多年來分歧不斷，衝突不斷，『自由巴布亞運動』（O P M）呢啲分離主義組織因而成立。雖然巴布亞土著及印尼其他主要民族同住一個國家內，但其實有啲似生活喺兩個世界內咁。
印尼係一個有多民族共融嘅國家，各民族都有各生活方式，衝突少不了，於是乎，喺印尼最多人鐘意嘅體育運動 - 足球 ，有時候會變成減少衝突嘅『工具』。由於巴布亞大部分經濟財產比小部分人控制，土著要出頭，最好就係出去經濟中心爪哇島揾機會，而巴布亞受爪哇島影響流行足球 ，喺印尼做職業足球員人工好彩嘅唔差，留喺巴布亞嘅男土著做全職業足球員可能會係另一出頭機會，因此印尼巴布亞有多支職業及半職業足球隊及多位職業及半職業足球員，佩斯普拉（Persipura Jayapura）就係印尼巴布亞足球最有代表性嘅一支職業足球隊，球員以巴布亞土著為主，由於贏過幾次印尼冠軍，大部分巴布亞土著都幾尊崇呢支查雅普拉市嘅球隊，巴布亞人喺印尼人口唔多比華人要少，少數人嘅足球隊可以成為印尼冠軍又可以代表印尼打亞洲賽，可以令巴布亞土著自豪又可以培養土著加强『國家』意識，認清自己係印尼一份子。
由於部分司職中、前場嘅巴布亞土著足球員喺聯賽內有良好表現，因此呢十年內都有巴布亞土著足球員入選印尼國家足球隊，例如Boaz Solossa（蘇洛沙）、Ian Kabes（卡比斯）、Eduard Ivakdalam(艾華達林)、Imanuel Wanggai（雲格爾）、Elie Aiboy（艾保爾）等等， 更多巴布亞土著足球員入選國家隊亦可能令更多巴布亞土著歸信印尼，亦可能令印尼其他主要民族嘅球迷感到不是味兒，但我睇到嘅係，巴布亞土著足球員入選國家隊並非為咗『和諧』，並非為咗消除分離主義思想，而係部分巴布亞土著足球員表現值得入選，可以幫到國家隊，點解唔選呢？如果因為你自己係印尼其他主要民族就唔希望印尼隊變成巴布亞隊，咁你即係認自己唔視巴布亞土著係印尼一份子。
世代變，越黎越多印尼其他主要民族視巴布亞土著係印尼一份子，但悲哀嘅係，好多外國人依然誤以為佢地係「非洲黑人歸化足球員」。