又輸一場！唔係講緊曼聯，係喺印尼幾有影響力嘅雅加達球隊PERSIJA JAKARTA（佩斯查），繼前一輪主場1比4輸畀阿雷馬及上輪作客輸畀斯里維加亞後今晚再次輸波，主場以0比2不敵婆羅乃FC。佩斯查雖然喺印錦賽A下半季加入曾經效力新職DPMM FC嘅巴西前鋒Rodrigo Tosi及2013年效力過佩斯查嘅喀麥隆前鋒Emmanuel Kenmogne加強鋒力，仲簽埋由泰國回流，已歸化印尼，原籍尼日尼亞嘅快翼Greg Nwokolo，加埋幾位老將，一班後生土砲及原先留低嘅兩位援兵，咁多猛人助陣下九月起試過六場不敗，但去到近三輪面對住勁旅，正選龍門Andritany Ardhiyasa及中堅Gunawan Dwi Cahyo又去咗大國腳集訓營，呢兩位球員可以話非常關鍵，所以又連輸三場，距離跌落印錦賽A積分榜包尾又近一大步。
除咗以上因素，仲有一樣嘢對佩斯查非常不利，就係主場被安排喺距離雅加達有五百幾公里嘅Solo（梭羅）Manahan Stadium，如同中立場，由於路程太遠，大批居於雅加達嘅球迷無法前往當地為球隊吶喊，冇咗主場之利對佩斯查係最大打擊，睇睇其他球隊，好似萬隆、巴東等都係靠主場之利屈分就知主場對印尼球隊好重要，因為印尼太大，好多時作客都要飛東飛西，前往路途已經令客隊球員疲憊不堪，而且有主場球迷為主隊吶喊係唔同嘅，除非實力太差，否則呢兩樣嘢絕對有利主隊。
冇得用雅加達做主場嘅原因係Gelora Bung Karno Stadium閉館維修迎亞運，而雅加達只有幾個容納人數不足萬五嘅細場，根本唔夠佩斯查班球迷坐，所以賽會就決定安排位處中爪哇省嘅Manahan Stadium畀佩斯查做臨時主場，但其實雅加達附近地區都有幾個場勉強可以畀佩斯查做主場，只不過當地政府拒絕佩斯查搬入去插旗，原因係怕咗佢哋班球迷，呢班自稱Jakmania嘅佩斯查球迷，有部分經常搞事，如同足球流氓一樣，所以為免麻煩，當地政府都向佩斯查說不。
而最重要係佩斯查季初仲有真.主場用時對斯里維加亞一仗發生印尼足壇近年最嚴重嘅足球騷亂，有多人受傷，包括警察，仲有一名小敗死亡，場內設施被破壞，場外多架車被放火燒咗，警察同足球流氓激戰到第二朝先控制到場面，呢單嘢令Jakmania臭名遠播，大量和理非派都被擋埋流氓暴徒，咁啱Gelora Bung Karno Stadium閉館，所以賽會順手將佩斯查踢去中爪哇省，唔畀班球迷去睇波及搞事。
搬去中爪哇省做主場後，入場人數少好多，有時超過一千，有時一千以下，場面冷清，氣勢同Gelora Bung Karno Stadium時期五、六萬差得遠，冇乜人去現場支持加上異地作賽令佩斯查戰績一般，收入更大大減少，為止蝕，佩斯查有時會將主場權送畀客隊，咁都係閉館維修及足球流氓擾亂社會嘅原因所致，幸好印錦賽A並冇升降。
提到部分Jakmania嘅行為，當地政府及球隊其實都係束手無策，印尼足協等單位對付球迷騷亂嘅方法，以往都係罰主隊錢，透過罰錢，推個波畀佩斯查（會方）負責任，但佩斯查可以做啲乜呢？叫Jakmania唔好搞事？搞黑名單？叫Jakmania唔好入場？冇嚴厲嘅法律，根本阻嚇唔到班流氓搞事。而搞事嘅流氓，絕大多數都係未成年嘅少年，就算被捕，只要唔係太嚴重最後都會冇事，但政府從來唔正視呢啲問題，悲劇就只會不停發生，佩斯查只會愈嚟愈頹。
嚟緊佩斯查會喺臨時主場Manahan Stadium對世仇萬隆，呢場印尼老打吡必定吸引大量球迷長途跋涉去到球場睇波，但警方已表明希望球迷留喺屋企睇電視直播，不過餓咗波好耐嘅Jakmania會聽呢類忠告嗎？早前傳出因為今年球迷情緒特別高漲，會方考慮閉門，但閉門都阻止唔到個別球迷於街頭械鬥，點做都好似冇用咁，呢個就係印尼足球面對嘅其一難題。