印尼今晚會作客挑戰泰國，爭奪首個東南亞冠軍，雖然賽前不被外界睇好下殺入鈴木盃總決賽，更於首回合先勝泰國，但今晚作客泰國一戰見網上一班印尼球迷普遍唔睇好自己國家，的確作客挑戰泰國比挑戰越南難度更高，呢隊半實驗性質印尼國家足球隊能夠去到最後一關已達標，反而球迷們正在討論另一問題多過研究會唔會又做二奶，就係印尼隊日後仲需唔需要喺海外尋找有印尼血統嘅血統球員？仲需唔需要喺印尼踢波超過五年取得印尼籍嘅歸化球員幫手呢？因為今次除咗中場Stefano Lilipaly（李利柏尼）係荷蘭出身嘅血統球員外，所有球員都係土砲。
2010年印尼足協開始搵血統球員幫拖，亦批准喺印尼踢波超過五年，並有意歸化印尼嘅外援球員歸化印尼，至今成功收歸嘅海外血統球員及歸化球員超過十位，有少數已退役，少數於海外效力，其他都留喺印尼發展，呢批非土砲球員代表印尼後令印尼隊實力有改進，例如印尼足球史上第一位歸化印尼，原籍烏拉圭嘅前鋒Cristian Gonzáles（干沙利斯）喺2010年鈴木盃就係憑佢嘅入球四強淘汰菲律賓，2015年亞洲盃外圍賽，原籍尼日尼亞嘅中堅Victor Igbonefo（伊保力科）喺賽事內都有穩定嘅表現。
但今次印尼隊幾乎以全土砲出戰成積卻比2014年參加鈴木盃，有兩位血統球員及兩位歸化球員助陣嘅印尼隊要好，咁就令部分球迷、球壇高人重新思考呢個問題，雖然血統球員及歸化球員有助印尼隊與亞洲列強差距收窄些少，但面對呢批列強都係輸多，而所尋得嘅海外血統球員大部分喺當地都係三、四線球員，雖然去到印尼可能超班，但面對一批亞洲列強都係冇咩料到，又或者嗰位血統球員本身有料，但等到願意入籍時高峰已過，好多喺印尼踢咗五年以上波嘅已歸化前外援都係因為年紀問題冇當初咁犀利，所以呢批血統球員同歸化球員代表印尼踢國際賽係有幫助，只不過效用不大，2014年世界盃外圍賽雖然主場僅負卡塔爾，但最終六戰全敗，2015年亞洲盃外圍賽成功迫和中國，但都係要包尾，2014年鈴木盃更以四球不敵菲律賓出局。
而細看印尼現時一班青年小將，確實唔會比現時嘅血統球員及歸化球員差幾多，咁已開腔希望歸化印尼嘅阿根庭外援Esteban Vizcarra(維斯卡拉)同日本亞援松永祥兵將來仲有冇機會歸化印尼為印尼踢國際賽？我就認為如果好似李利柏尼咁真係對隊波有好大作用，同班土砲隊友明顯高成一班有多嘅，係值得入選，但唔需要咁濫，可以接納仲當打嘅松永祥兵成為歸化球員。
雖然鈴木盃只不過係東南亞圍內飛機盃，但今屆印尼一批本土砲確係好爭氣，講返遠少少去返香港，我都希望省港盃班B隊土砲球員踢返兩場爭氣波，唔好只識用口講話歸化球員搶你飯碗，用口講係冇用嘅，好似印尼班土砲咁用表現令班睇死佢哋嘅人收晒皮，咁先係路嘛。