關於印尼超級聯賽嘅票價，其實好浮動，可以由球會而定，例如上年婆羅洲南部城市馬辰嘅PS Barito Putera(巴力圖) 對阿雷馬，票價就有分幾種，冇瓦遮頭嘅看台，冇獨立座位嘅票價每張3萬5千蚊(約港幣28-29蚊)，主看台最左右2旁票價每張7萬5千蚊(約港幣60蚊)，冇咩錢嘅可以買企位，票價每張1萬5千蚊(約港幣12-13蚊)，VIP位 (有瓦遮頭嘅主看台，有獨立膠椅，唔洗日灑雨淋，中間位左右2旁)嘅票價每張10萬蚊(約港幣80蚊)，而超級VIP位 (有瓦遮頭嘅主看台，有獨立膠椅，唔洗日灑雨淋，中間位)嘅票價每張170萬(約港幣1,388蚊)，因為馬辰最有代表性嘅球會就係巴力圖，而馬辰嘅生活冇雅加達等大城市咁多姿多采，足球變成一種重要娛樂活動，而且上年啱啱升上超級聯賽，全市為咗呢支球會而狂熱，所以部分比賽嘅票價可以非常昂貴。
170萬嘅超級VIP位門票，只係為咗吸引有錢人睇而設，冇乜錢嘅人，只可以買啲冇咁貴嘅票，但有唔少球迷係低下階層，有啲甚至連企位票都買唔起，佢地只可以爬上樹頂、沿水管爬上球場圍牆頂或者趁混亂衝入球場冒險去睇免費足球(此舉又引來真金俾錢個班喪屌)，所以巴力圖主場經常座無虛席，有時燈塔都爬滿晒人，但最終公佈嘅售票數目經常與現場環境有差距。
因為對一啲球迷而言定價太貴，所以引起唔少批評，但唔少球迷一邊批評呢邊俾錢買票，無他，係睇嘅，始終會入場睇。其實印尼超級聯賽係有免費電視直播，點解仲有咁多人願意捱貴票去現場睇？又係無他，現場睇同電視直播兩回事，而且唔少球迷認為入場唔止係支持主隊嘅表現，看台上仲可以係一個派對。