印尼係一個多民族共存國家，就連印尼足球壇入面都可以體會到呢樣嘢，例如爪哇東北部嘅Madura Island（馬都拉島）內就住咗好多原生民族馬都拉族（Suku Madura），馬都拉族雖然同印尼大族爪哇族一樣主要信伊斯蘭教，但馬都拉人有自己獨有文化同語言，當地官方足球隊Persatuan Sepak Bola Pamekasan Madura（馬都拉隊）有比賽時看台都可以睇到好多球迷扮牛，因為牛自古以來對馬都拉人嚟講非常重要，所以近年買殼返嚟嘅球隊Madura United（馬都拉聯）會徽都有一隻水牛。
馬都拉聯嘅Supporters入面有唔少扮成牛為馬都拉吶喊，雖然球迷人群不如萬隆、雅加達、泗水多，但一批Supporters一樣咁投入咁熱血，當中有位冇搽到全身又白又紅嘅阿伯非常出名，佢名叫Mbah Hosen，正宗馬都拉人，當Persatuan Sepak Bola Pamekasan Madura喺1970年代成立佢已經係球迷，一直撐到現時Madura United（馬都拉聯）年代，支持馬都拉足球已經就快50年。
呢位hardcore派球迷喺看台上多數出任指揮員，不論球隊曾經係喺最低組別，佢都會放下工作及忙碌到場支持，馬都拉隊1970年代起至今嘅比賽佢九成都有入場睇，退休後就搬去島外居住，但可能更得閒，連B隊同梯隊都捧埋，今年74歲依然企喺通架及欄杆頂上為球隊付出力氣，所以絕大部分印尼球迷都非常尊重呢位咁hardcore嘅阿伯。