印尼雅加達亞運未開皮就有蝦碌嘢，又有人挖返印尼體育界做過嘅柒嘢出嚟講，包括發生喺2010年尾嘅足球雙胞案，發展到中期嗰陣除咗有兩個自稱官方嘅聯賽出現外，仲有兩個足球組織話自己係代表印尼，一個係FIFA及AFC認可嘅Persatuan Sepak Bola Seluruh Indonesia（PSSI），一個係FIFA及AFC唔認可嘅Komite Penyelamat Sepak Bola Indonesia（KPSI），不過大部分有叫座力嘅球會都喺KPSI手中，令到PSSI嗰面一直捱打。
本身係PSSI管理嘅11-12賽季Indonesian Premier League參賽球會之一嘅Persib Bandung踢完揭幕戰後忽然強行離開PSSI加入KPSI，揭開混亂序幕，而國家隊精英球員主要集中喺KPSI搞嘅Indonesia Super League嘅球會入面，由於Indonesia Super League係KPSI管，所以喺Indonesia Super League踢緊嘅國家隊精英喺嗰陣好難入選印尼國家隊，令印尼國家隊實力削弱。
但KPSI一直都表示自己係印尼唯一合法嘅足總機構，喺2012年鈴木盃舉行前席仲公佈自己嘅30人國家隊集訓名單，搞過兩場圍內友賽，甚至向PSSI發出挑戰書，要求PSSI嘅印尼國家隊同自己嘅印尼國家隊打返場，然後邊個贏就邊個代表印尼去打鈴木盃，PSSI方面都有還拖，大家互相稱讚自己管治下嘅印尼國家隊先係最強，但最後印尼國家隊對印尼國家隊呢個對決冇實現，因為PSSI根本冇接受過KPSI嘅挑戰。
結果喺2012年鈴木盃名單內有13位都係國家隊新丁，另外仲有3位啱啱拎護照嘅血統球員及一位外流泰超嘅血統球員相助，比較有經驗得3位，本身已經退出印尼國家隊嘅快翼Elie Aiboy要捱義氣復出，因為合約問搞到冇班落嘅Oktovianus Maniani都有入選，而射手Bambang Pamungkas係唯一一個喺KPSI嘅Indonesia Super League入面搵食而又敢膽唔理清算為PSSI嘅印尼國家隊效力嘅球員。
當時好多喺KPSI嗰面嘅球員其實都想踢印尼國家隊，不過因為合約問題啲球員都唔多敢嗲，因為唔理你係只想踢波定點，你已經畀某方勢力綁架咗，Bambang Pamungkas比較特別，佢地位超然唔怕手尾嘢，所以就決定向官方國家隊報到。但點都好，印尼都係衰咗，就算有Bambang Pamungkas同Elie Aiboy呢啲好波之人帶住，最後都係不敵大馬出局。