印尼亞運男足喺十六強互射十二碼畀阿聯酋淘汰後，部分印尼網民喺社交網屌爆今場執法球證，來自澳洲嘅Shaun Evans，因為球證事宜由AFC安排所以會見到澳洲球證，究竟啲印尼網民屌佢做咩？主因係印尼兩個失波來自十二碼，而大部分印尼網民認為呢兩球並非惡意犯規係唔需要吹罰，另外好多時喺禁區外Shaun Evans都吹罰印尼球員，反而部分阿聯酋球員一啲小動作佢就睇唔到，可以咁講，部分印尼球迷將印尼出局嘅責任推落佢到。
而我自己睇完就覺得Shaun Evans吹得都幾嚴，印尼球員啲小動作大部分過唔到佢嗰關，而阿聯酋球員都有啲小動作，其實Shaun Evans見到過分都會吹，只不過印尼球迷多多少少因為支持印尼所以有啲失去理智覺得Evans偏幫阿聯酋，我就覺得Evans應吹就吹並冇咩主場雞或偏幫，嗰兩球十二碼都真係印尼球員有明顯動作所以吹罰，本身自己解圍唔拖唔水導致嘅。
可能只係我嘅感覺，我覺得佢吹得幾好，但係有一個陰謀論爆出，就係話Evans專登向印尼復仇！事關2017年印尼甲組聯賽賽會LIB曾經請過海外球證嚟印尼執法，其中一個就係Evans，Evans曾經吹過國家隊級別嘅亞洲賽，又吹過亞冠，平時多數喺澳職吹比賽，本身LIB請海外球證原因係印尼本土球證水平太參差成日惹爭議，但Evans去到印尼執法聯賽賽事時啲爭議判罰都幾多，對佢嘅讚賞唔少，但質疑佢嘅聲音更多，可以話佢喺一個唔太好嘅結局下離開印尼。
雖然同印尼曾經有啲關係，但復仇呢啲嘢或者係印尼球迷諗多咗，我作為一個又唔係支持印尼更加唔係支持阿聯酋嘅垃圾波球迷，喺呢場波用一個中立角度去睇，Evans係有過火就吹，唔覺特別幫邊隊，有問題就響B停你，唔會怕你幾萬球迷所畀嘅壓力，印尼隊助教嘈生晒警告無效即Ban出場，我就覺得冇乜嘢喇，瀨球證不如自己檢討吓自己有咩問題，例如點解操咗就快兩年都仲係咁呢？其實今場印尼嗰後防線失誤唔多係今屆表現最好一場，但衰嗰兩嘢都夠你死，出局就係出局，都冇咩好瀨咯，陪陪香港吧。