球壇老將何其多，佢哋知道自己已經唔係後生，正選未必常有，但就算只係得20分鐘落場都好，有得踢佢就會同你搏老命。
呢份心態，就係鬥心。但偏偏大多數人，係愈大愈冇鬥心，好似已經看透世事，無欲無求，能得過且過時就且過，究竟係心態所致定係環境影響？答案，其實一直喺心裡面。
最近聽朋友分享，有場比賽唔夠人開波，比賽前夕仲係得10個人，仲要臨時有球員飛機，人唔齊，出席嘅球員心慌慌唔知點算，但佢哋嘅領袖一句：「9個咪9個，照打，每人走多步，驚佢呀？」
呢位領袖幾近5張嘢。
我唔知佢係真係唔怕輸定充大頭鬼，9打11喎，大場喎，但幾近50嘅佢，唔怕輸、唔怕攰、唔怕要捱打都要打落去，除咗有鬥心之外，我諗唔到點樣去形容。
鬥心係咩？就係無論年紀有幾大距離、球技有幾咁參差，實力差幾咁遠，爭輸咗我就低頭拚命追、搶失咗我就回頭再搶過，總之就唔怕輸！
鬥心鬥心，就係有戰鬥嘅心！
好多廿零歲嘅人（包括我）成日話自己老喇跑唔郁、踢波當玩波都唔會進步㗎啦呢個年紀，但其實大家可能知道只不過係籍口，想贏波想進步嘅心態依然強烈，只係成日覺得自己已經過咗頂峰而將嗰份鬥心收埋，但其實只要對勝負仲有一份執著或者在意，足以證明你嗰份鬥心依然存在，因為你會諗盡辦法去贏呢場比賽，那怕嗰團火時大時細，無可否認佢依然存在，只要一再起火，自可燎原。
鬥心嘅嘢，從來冇分年齡，無論14歲定41歲，只要你肯去做，鬥心一定係度，唔好俾籍口自己。
當我哋見到38歲嘅保方依然左飛右撲、40嘅托迪冒雨中熱身準備落場，我諗佢哋唔只係想話俾球迷聽去到呢個年紀仲有貨賣，仲想以身作則向球迷講：年紀唔係問題，心態先係成就高低。
踢波如是，做人也如是。